ڈاکٹر آشیش کمار بھوتانی نے کوآپریٹو سے متعلق منصوبوں کا جائزہ لیا پٹنہ، 6 اگست(ہ س)۔کوآپریٹو کی وزارت مرکزی حکومت کے سیکریٹری ڈاکٹر آشیش کمار بھوتانی نے جمعرات کو ریاست میں چلائی جارہی کوآپریٹو اسکیموں کا جائزہ لیتے ہوئے افسران کو ہدایت دی کہ وہ مقررہ مدت کے اندر تمام اسکیموں کے معیار پر عمل آوری کو یقینی بنائیں۔ انہوں نے کہا کہ اسکیموں کے حقیقی فوائد مستحقین تک پہنچنے کو یقینی بنانے کے لیے مسلسل نگرانی، ڈیجیٹائزیشن اور محکمانہ تال میل کو مزید مضبوط کیا جانا چاہیے۔شاستری نگر میں ڈی این ایس ریجنل کوآپریٹیو مینجمنٹ انسٹی ٹیوٹ میں منعقدہ جائزہ میٹنگ میں، ڈاکٹر بھوتانی نے کہا کہ کوآپریٹو کے ذریعے خوشحالی کے ہدف کو حاصل کرنے کے لیے جوابدہی، شفافیت، اور نتیجہ خیز کام کی ثقافت کو اولین ترجیح دی جانی چاہیے۔ انہوں نے بہار میں ویگ فیڈ کے قیام، بہار اسٹیٹ کوآپریٹو پالیسی-2026 کے نفاذ، نئی کوآپریٹو سوسائٹیوں کی تشکیل اور کوآپریٹو سیکٹر میں کئے گئے دیگر کاموں کی ستائش کی اور ریاست کو مرکزی حکومت کی طرف سے ہر ممکن تعاون کا یقین دلایا۔میٹنگ میں مرکزی حکومت کی مختلف اسکیموں کی پیش رفت، کامیابیوں، چیلنجوں اور مستقبل کے ایکشن پلان کا جامع جائزہ لیا گیا۔ نئی ملٹی پرپز پرائمری ایگریکلچرل کریڈٹ سوسائٹیز (ایم پیکس) ڈیری اور فشریز کوآپریٹو سوسائٹیز کی تشکیل،پیکسوں کا کاروباری تنوع، پردھان منتری جن اوشدھی کیندر (پی ایم جے اے وائی)، کامن سروس سینٹرز(سی ایس سی)، نیشنل کوآپریٹو ڈیٹا بیس،پیکس کمپیوٹرائزیشن،گودام کی تعمیر ، خوراک کا حصول، ایف پی او ، مدھوکرانتی، اور تربیتی پروگراموں پر تفصیل سے تبادلہ خیال کیا گیا۔دیہی علاقوں میں گودام کی تعمیر کو تیز کرنے، اسٹوریج کے بنیادی ڈھانچے کو مضبوط بنانے اور ڈیجیٹل پلیٹ فارم کو مؤثر طریقے سے استعمال کرنے پر خصوصی زور دیا گیا۔ افسران نے مختلف اسکیموں کی پیش رفت، زیر التوا پروجیکٹوں اور انتظامی چیلنجوں کے بارے میں معلومات فراہم کیں۔ جائزے کے دوران خواتین کے گروپوں، دیہی صنعت کاروں اور پرائمری کوآپریٹو سوسائیٹیوں تک ا سکیم کے فوائد کو مؤثر طریقے سے پہنچانے کے ساتھ ساتھ محکموں کے درمیان باقاعدگی سے نگرانی، استعداد کار میں اضافہ اور بہتر کوآرڈینیشن کی ہدایات بھی دی گئیں۔
ہندوستھان سماچار
ہندوستان سماچار / Mohammad Afzal Hassan
