جعلی دستاویزات کے ذریعے بنجارا وِمکت جاتی کا سرٹیفکیٹ حاصل کرنے کا الزام، رکنیت پہلے ہی منسوخ ہو چکیناسک، 6 اگست (ہ س)۔ جعلی دستاویزات کی بنیاد پر بنجارا وِمکت جاتی (وی جے اے) زمرے کا ذات سرٹیفکیٹ حاصل کرنے کے الزام میں اُلہاس نگر کے سابق کارپوریٹر وکی درشن سنگھ لبانہ کے خلاف ناسک کے سرکارواڑا پولیس اسٹیشن میں دھوکہ دہی کا مقدمہ درج کیا گیا ہے۔ ناسک کے ایڈیشنل تحصیلدار امول وشنو نکم کی شکایت پر درج مقدمے میں الزام عائد کیا گیا ہے کہ وکی لبانہ نے سب ڈویژنل مجسٹریٹ کے دفتر کو گمراہ کرتے ہوئے غلط معلومات، جعلی دستاویزات اور فرضی خاندانی شجرہ پیش کر کے ذات کا سرٹیفکیٹ حاصل کیا۔عام طور پر فرضی ذات سرٹیفکیٹ کے معاملات میں ذات جانچ کمیٹی سرٹیفکیٹ کو کالعدم قرار دے کر کارروائی کرتی ہے، تاہم اس معاملے میں انتظامیہ نے براہ راست فوجداری کارروائی کا راستہ اختیار کیا ہے۔ پولیس کے مطابق وکی لبانہ نے آن لائن درخواست کے ذریعے 17 دسمبر 2025 کو بنجارا وِمکت جاتی (وی جے اے) زمرے کا سرٹیفکیٹ حاصل کیا تھا۔ الزام ہے کہ اس مقصد کے لیے جعلی بجلی کا بل، والد کا فرضی اسکول لیونگ سرٹیفکیٹ اور غلط خاندانی شجرہ پیش کیا گیا۔اسی ذات سرٹیفکیٹ کی بنیاد پر انہوں نے اُلہاس نگر میونسپل کارپوریشن کا انتخاب لڑا اور کامیابی حاصل کی، تاہم ذات کی تصدیقی کارروائی کے دوران دستاویزات میں بے ضابطگیاں سامنے آنے پر سرٹیفکیٹ کالعدم قرار دے دیا گیا۔ بعد ازاں اُلہاس نگر میونسپل کارپوریشن کی کمشنر منیشا آوہالے نے ان کی کارپوریٹر کی رکنیت بھی منسوخ کر دی۔ پولیس نے بھارتیہ نیائے سنہتا کی دفعات 336(3)، 338، 340(2) اور 318(4) کے تحت مقدمہ درج کیا ہے۔ مقدمے میں حکومت کو دھوکہ دینے کے لیے جعلی بجلی کا بل، فرضی اسکول لیونگ سرٹیفکیٹ اور غلط خاندانی شجرہ پیش کرنے کا الزام عائد کیا گیا ہے۔ سرکارواڑا پولیس نے معاملے کی تفتیش شروع کر دی ہے اور ملزم کو نوٹس جاری کرنے کی کارروائی بھی جاری ہے۔ اس مقدمے کی تفتیش خاتون پولیس سب انسپکٹر آمبھورے کر رہی ہیں۔

ہندوستھان سماچار

--------------------

ہندوستان سماچار / جاوید این اے