بھارت کو تخلیقی معیشت کا عالمی مرکز بنانے کے لیے عالمی معیار کا بنیادی ڈھانچہ ناگزیر، دیویندر فڑنویس۔ فلم سٹی میں پرائم فوکس کے جدید اسٹوڈیو کے پہلے مرحلے کا افتتاح، نوجوانوں کے لیے نئے مواقع پیدا کرنے کے عزم کا اظہارممبئی ، 6 اگست (ہ س) مہاراشٹر کے وزیر اعلیٰ دیویندر فڑنویس نے کہا ہے کہ بھارت کو تخلیقی معیشت کا عالمی مرکز بنانے کے لیے جدید ٹیکنالوجی اور عالمی معیار کے بنیادی ڈھانچے کی فراہمی ناگزیر ہے۔ انہوں نے کہا کہ ریاستی حکومت نوجوانوں کی تخلیقی صلاحیتوں کو فروغ دینے، روزگار کے نئے مواقع پیدا کرنے اور تفریحی صنعت کے لیے مضبوط ماحولیاتی نظام قائم کرنے کے لیے پوری طرح پرعزم ہے۔دیویندر فڑنویس نے گوریگاؤں کی فلم سٹی میں پرائم فوکس کے عالمی معیار کے جدید اسٹوڈیو کے پہلے مرحلے کا افتتاح کیا۔ اس موقع پر ریاستی وزیر برائے ثقافتی امور آشیش شیلار، مرکزی وزارت اطلاعات و نشریات کے سکریٹری چنچل کمار، محکمہ ثقافتی امور کے سکریٹری ڈاکٹر کرن کلکرنی، دادا صاحب پھالکے چترنگری کی منیجنگ ڈائریکٹر سواتی مہسے پاٹل اور پرائم فوکس گروپ کے اعلیٰ عہدیداران بھی موجود تھے۔وزیر اعلیٰ نے کہا کہ ممبئی میں عالمی معیار کی سہولیات سے آراستہ اسٹوڈیو قائم کرنے کا پرائم فوکس کا خواب آج حقیقت بن گیا ہے، جہاں سے دنیا بھر کی تفریحی اور تخلیقی صنعتوں کو جدید خدمات فراہم کی جائیں گی۔ انہوں نے بتایا کہ ریاستی حکومت نے اس منصوبے کی بروقت تکمیل کے لیے ہر ممکن تعاون فراہم کیا۔ ان کے مطابق ویوز 2025 کانفرنس کے دوران مفاہمتی یادداشت پر دستخط کے صرف ایک سال کے اندر منصوبے کے پہلے مرحلے کی تکمیل ایک اہم کامیابی ہے۔دیویندر فڑنویس نے کہا کہ بھارتی ثقافت، تاریخ اور روایات میں بے شمار ایسی کہانیاں موجود ہیں جنہیں عالمی سطح پر پیش کرنے کے لیے جدید ٹیکنالوجی اور مضبوط تخلیقی ماحولیاتی نظام کی ضرورت ہے۔ ان کے مطابق پرائم فوکس کی یہ نئی سہولت اس مقصد کے حصول میں اہم کردار ادا کرے گی۔انہوں نے بتایا کہ دنیا کی بڑی مشترکہ فلمی پروڈکشنز میں شامل فلم رامائن کی شوٹنگ اور پروڈکشن بھی اسی اسٹوڈیو میں جاری ہے۔ انہوں نے فلم کی پوری ٹیم کو مبارکباد دیتے ہوئے امید ظاہر کی کہ یہ فلم عالمی سطح پر بھارتی تخلیقی صلاحیتوں کا بہترین مظہر ثابت ہوگی۔وزیر اعلیٰ نے کہا کہ مہاراشٹر حکومت فلم سٹی کو عالمی معیار کے تخلیقی اور تفریحی مرکز میں تبدیل کرنے کے لیے جامع ترقیاتی منصوبے کو جلد حتمی شکل دے گی، تاکہ ممبئی عالمی تخلیقی صنعت کے اہم مراکز میں شامل ہو سکے۔ہندوستھان سماچار--------------------

ہندوستان سماچار / جاوید این اے