عالمی یومِ ہیپاٹائٹس کے موقع پر اجمل خاں طبیہ کالج ، اے ایم یو میں مفت طبی کیمپ منعقد

علی گڑھ، 06 اگست (ہ س)۔ علی گڑھ مسلم یونیورسٹی کے اجمل خاں طبیہ کالج، فیکلٹی آف یونانی میڈیسن کے شعبہ معالجات نے عالمی یومِ ہیپاٹائٹس کے موقع پر اجمل خاں طبیہ کالج اسپتال میں نئی دہلی کی ایمیل فارماسیوٹیکلز کے اشتراک سے مفت طبی کیمپ منعقد کیا، جس میں جگر کی بیماریوں، ان سے بچاؤ، بروقت تشخیص اور مناسب علاج و نگہداشت کے بارے میں عوامی بیداری پیدا کی گئی۔

اس دوران مجموعی طور پر 62 مریضوں نے طبی مشورے اور علاج کی سہولیات سے استفادہ کیا۔ شرکاء کو صحت مند طرزِ زندگی، غذائی احتیاط، اور علاج کی باقاعدہ پابندی کی اہمیت سے بھی آگاہ کیا گیا تاکہ ہیپاٹائٹس اور اس کی پیچیدگیوں کے بوجھ کو کم کیا جا سکے۔ مریضوں کو ادویات بھی فراہم کی گئیں۔

شعبہ معالجات کے چیئرمین پروفیسر بدرالدجیٰ خاں نے کیمپ کے کامیاب انعقاد میں فیکلٹی اراکین، پوسٹ گریجویٹ طلبہ اور بی یو ایم ایس انٹرنز کی کاوشوں کو سراہا۔ انہوں نے صحت کیمپ کے انعقاد میں ایمیل فارماسیوٹیکلز کے تعاون کا بھی اعتراف کیا۔

ہندوستھان سماچار

---------------

ہندوستان سماچار / سید کامران علی گڑھ