سون بھدر، 5 اگست(ہ س)۔

اتر پردیش کے ضلع سون بھدر میں بدھ کے روز ایک المناک سڑک حادثے میں موٹر سائیکل پر سوار دو افراد جاں بحق جبکہ ایک خاتون اور ایک بچہ شدید زخمی ہو گئے۔ یہ حادثہ رابرٹس گنج کوتوالی علاقے میں وارانسی-شکتی نگر شاہراہ پر مدھوپور فلائی اوور کے قریب اس وقت پیش آیا جب ایک نامعلوم تیز رفتار گاڑی نے موٹر سائیکل کو پیچھے سے ٹکر مار دی۔

پولیس کے مطابق پرہی گاؤں کے رہائشی سبھاش یادو (27) اپنے رشتہ دار کے گھر سکرت گئے ہوئے تھے۔ وہاں سے واپسی کے دوران وہ تیترا دیوی (70)، سات سالہ آرین اور اس کی والدہ کے ساتھ ایک ہی موٹر سائیکل پر مدھوپور جا رہے تھے۔ دوپہر تقریباً ساڑھے گیارہ بجے جیسے ہی وہ مدھوپور فلائی اوور کے قریب پہنچے، پیچھے سے آنے والی ایک تیز رفتار بس نے ان کی موٹر سائیکل کو ٹکر مار دی اور موقع سے فرار ہو گئی۔

حادثے کے نتیجے میں سبھاش یادو اور تیترا دیوی موقع پر ہی دم توڑ گئے، جبکہ آرین اور اس کی والدہ شدید زخمی ہو گئیں۔اطلاع ملتے ہی پولیس موقع پر پہنچی اور دونوں زخمیوں کو فوری طور پر مدھوپور کے کمیونٹی ہیلتھ سینٹر منتقل کیا، جہاں ابتدائی طبی امداد کے بعد بچے کی تشویشناک حالت کے پیش نظر اسے میڈیکل کالج ریفر کر دیا گیا۔پولیس نے دونوں جاں بحق افراد کی لاشیں پوسٹ مارٹم کے لیے ضلع اسپتال بھیج دی ہیں اور حادثے کا سبب بننے والی نامعلوم گاڑی اور اس کے ڈرائیور کی تلاش شروع کر دی ہے۔

ہندوستھان سماچار

ہندوستان سماچار / Mohammad Khan