ٹرمپ کے کیلیفورنیا گولف کورس سے مشتبہ شخص گرفتار، ہتھیار اور دھماکہ خیز مواد برآمد

واشنگٹن، 05 اگست (ہ س)۔ امریکی صدر ڈونلڈ ٹرمپ کے کیلیفورنیا میں واقع گولف کورس سے 2 اگست کو ایک مشتبہ شخص کو گرفتار کیا گیا۔ اس کے پاس سے ہتھیار اور دھماکہ خیز مواد کے طور پر گولا بارود برآمد ہوا ہے۔ اس واقعہ سے سیکورٹی اور قانون نافذ کرنے والی ایجنسیاں حیران ہیں۔ لاس اینجلس کاونٹی شیرف ڈپارٹمنٹ نے منگل کو جاری بیان میں کہا کہ جنوبی کیلیفورنیا میں ٹرمپ نیشنل گولف کلب کے باہر اتوار کو ایک مسلح شخص کو گرفتار کیا گیا۔ وفاقی ایجنٹوں کے مطابق، یہ مشتبہ شخص احاطے میں گھوم رہا تھا۔

سی این این کی رپورٹ کے مطابق، وفاقی قانون نافذ کرنے والے ذرائع نے بتایا کہ سکریٹ سروس اس بات کی جانچ کر رہی ہے کہ کیا وہ شخص صدر ڈونلڈ ٹرمپ کے لیے خطرہ تھا۔ جب مشتبہ شخص کی گرفتاری کا اعلان کیا گیا تب ٹرمپ کیلیفورنیا جا رہے ایئر فورس 1 طیارے میں سوار تھے۔ صدر منگل کی شام اپنے رینچو پالوس ورڈیس گولف کورس میں ریپبلکن نیشنل کمیٹی کے ڈنر میں شامل ہونے والے ہیں۔

افسران کے مطابق، مشتبہ کی شناخت ڈاون کے 38 سالہ جینن جان ٹیلے کے طور پر ہوئی ہے۔ انہوں نے بتایا کہ ٹیلے کے خلاف ایل سیگونڈو میں لوٹ کا ایک مقدمہ پہلے سے درج ہے۔ شیرف ڈپارٹمنٹ کے مطابق، ٹیلے میدان پر تصویریں کھینچنے کے ساتھ ویڈیو بنا رہا تھا۔ ایسا لگ رہا تھا کہ وہ سیکورٹی سرگرمیوں پر نظر رکھ رہا تھا۔ اسے چھپا کر ہتھیار لے جانے اور ممنوعہ گولا بارود رکھنے کے الزام میں گرفتار کیا گیا۔

لاس اینجلس کاونٹی ڈسٹرکٹ اٹارنی دفتر کے مطابق، ٹیلے نے منگل کو چار الزامات میں خود کو بے قصور بتایا۔ ان الزامات میں نومبر 2025 کی لوٹ، ٹرمپ نیشنل گولف کلب میں تازہ گرفتاری کے بعد درج ہتھیار سے منسلک تین الزامات شامل ہیں۔ شیرف ڈپارٹمنٹ نے کہا کہ ایف بی آئی کی مشترکہ دہشت گردی مخالف ٹاسک فورس کے جاسوسوں نے پیر کو ٹیلے کے گھر کی تلاشی لی۔ اس دوران ایک نوٹ بک برآمد ہوئی۔ اس میں اے آر-اسٹائل رائفل، .45 کیلیبر کی پستول، باڈی آرمر، زیادہ صلاحیت والی میگزین، گولا بارود، ریڈیو سگنل ڈیوائس وغیرہ کے بارے میں لکھا ہے۔

ہندوستھان سماچار

---------------

ہندوستان سماچار / انظر حسن