آسان (جنوبی کوریا)، 5 اگست(ہ س)۔

بھارت کے تجربہ کار بیڈمنٹن کھلاڑی کدامبی سری کانت کا کوریا ماسٹرز 2026 کا سفر پہلے ہی راؤنڈ میں اختتام پذیر ہوگیا۔ سابق عالمی نمبر ایک سری کانت کو مردوں کے سنگلز کے مقابلے میں اسرائیل کے ڈینیئل دوبووینکو نے سخت مقابلے کے بعد 20-22، 21-14، 21-12 سے شکست دے کر ٹورنامنٹ سے باہر کر دیا۔

پہلا گیم معمولی فرق سے ہارنے کے بعد 33 سالہ سری کانت اگلے دو گیمز میں اپنی فارم برقرار نہ رکھ سکے، جبکہ ڈینیئل دوبووینکو نے شاندار کھیل کا مظاہرہ کرتے ہوئے مسلسل برتری قائم رکھی اور میچ اپنے نام کر لیا۔ اس شکست کے ساتھ سپر300- ٹورنامنٹ میں بھارت کی مردوں کے سنگلز میں امیدوں کو بڑا دھچکا پہنچا ہے۔

سری کانت حال ہی میں امریکا اوپن کے فائنل تک رسائی کے بعد حاصل ہونے والی عمدہ فارم کو برقرار رکھنے کے ارادے سے کوریا ماسٹرز میں اترے تھے، تاہم وہ آسان میں اپنی کارکردگی دہرانے میں ناکام رہے۔

دوسری جانب خواتین کے سنگلز میں بھارت کی نوجوان کھلاڑی تنوی شرما نے شاندار آغاز کرتے ہوئے چین کی یوان این کیوئی کو 21-16، 21-15 سے شکست دے کر دوسرے راؤنڈ میں جگہ بنا لی۔ اب دوسرے مرحلے میں ان کا مقابلہ ہم وطن شریانشی والیشیٹی سے ہوگا، جس کے باعث ایک بھارتی کھلاڑی کی کوارٹر فائنل میں رسائی یقینی ہو گئی ہے۔اس سے قبل مردوں کے ڈبلز میں پرتھوی کرشن مورتی رائے اور کرشنا پرساد گاراگا کی بھارتی جوڑی نے بڑا اپ سیٹ کرتے ہوئے تھائی لینڈ کی چوتھی سیڈ جوڑی وورراپول تھونگ سانگا اور چالومپون چاروئن کیتامورن کو 21-16، 21-18 سے شکست دے کر دوسرے راؤنڈ میں جگہ بنا لی۔

مردوں کے سنگلز کوالیفائنگ مقابلوں میں تشار سوویر نے پہلے میچ میں کینیڈا کے شوریہ گلیّا کو 21-15، 21-12 سے ہرایا، تاہم آخری کوالیفائنگ مقابلے میں جاپان کے شوگو اوگاوا سے 10-21، 17-21 سے شکست کھا گئے اور مرکزی ڈرا میں جگہ بنانے سے محروم رہے۔مردوں کے ڈبلز کے ایک اور مقابلے میں ارجن ریڈی پوچانا اور اچوتادتیہ راؤ دوڈاواراپو کی جوڑی کو دوسری سیڈ چوئی سول گیو اور گوہ وی شیم نے یکطرفہ مقابلے میں 21-3، 21-10 سے شکست دے دی۔

ادھر خواتین کے ڈبلز میں پریا کونجینگبام اور شروتی مشرا کی بھارتی جوڑی جاپان کی دوسری سیڈ ررینا ہیراموتو اور کوکونا ایشیکاوا کے خلاف 15-21، 13-21 سے ہار کر پہلے ہی مرحلے میں ٹورنامنٹ سے باہر ہوگئی۔

ہندوستھان سماچار

ہندوستان سماچار / Mohammad Khan