ممبئی، 5 اگست (ہ س)۔ ریزرو بینک آف انڈیا (آر بی آئی) کے گورنر سنجے ملہوترا نے بدھ کے روز کہا کہ ریزرو بینک مالی سال کے آغاز میں پولیمر نوٹ جاری کرنے کی تیاری کر رہا ہے۔ یہ نوٹ خاص طور پر کم مالیت کے نوٹوں کے لیے مفید ہوں گے، کیونکہ انکا زیادہ استعمال کیا جاتا ہے۔

آر بی آئی کے گورنر سنجے ملہوترا نے مالیاتی پالیسی کے جائزے کا اعلان کرنے کے بعد یہاں ایک پریس کانفرنس سے خطاب کرتے ہوئے کہا کہ مرکزی بینک کا مقصد مالی سال کے آغاز میں پلاسٹک کے نوٹ جاری کرنا ہے بشرطیکہ جاری فیلڈ ٹرائلز کامیاب ہوں۔ ملہوترا نے کہا کہ کچھ ممالک میں پولیمر نوٹوں کی شیلف لائف 30 سال سے زیادہ ہوتی ہے۔ انہوں نے کہا کہ اگر تمام منصوبے طے شدہ پروگرام کے مطابق چلتے ہیں تو ہمارا مقصد اگلے مالی سال کے آغاز تک ان نوٹوں کو بازار میں اتارنا ہو سکتا ہے۔

آر بی آئی کے گورنر کے مطابق پولیمر نوٹوں کے لیے درکار خصوصی مواد کی خریداری کا عمل شروع ہو گیا ہے۔ اس کے لیے ٹینڈر طلب کیے گئے ہیں۔ اس کے بعد معیار کی جانچ، حفاظتی معیارات کی جانچ اور مختلف تکنیکی منظوری دی جائیں گی۔ انہوں نے بتایا کہ اس پورے عمل میں متعدد سطحوں کی جانچ اور جدید ترین حفاظتی خصوصیات شامل ہوں سنجے ملہوترا نے کہا کہ یہ نوٹ تمام رسمی کارروائیاں مکمل ہونے کے بعد ہی بازار میں لانچ کیے جائیں گے۔ اگر منصوبہ بندی کے مطابق کام آگے بڑھتا ہے تو نوٹ اگلے مالی سال کے اوائل میں عام لوگوں کے لیے جاری کیے جا سکتے ہیں۔

روپے کی مضبوطی پر ملہوترا نے کہا کہ غیر ملکی سرمائے کی زیادہ آمد کے باوجود روپے میں توقع کے مطابق اضافہ نہیں ہوا ہے۔ انہوں نے نشاندہی کی کہ اگر عالمی تناؤ کم ہوتا ہے تو روپے کی مزید مضبوطی ممکن ہے۔ ملہوترا نے کہا کہ یہ آر بی آئی کی کوشش ہوگی کہ یہ یقینی بنایا جائے کہ روپیہ منظم اور مستحکم رہے۔

پولیمر نوٹ ایک خاص قسم کے پلاسٹک جیسے مصنوعی مواد سے بنایا جاتا ہے۔ اس میں ایک مضبوط اورپائیدار پلاسٹک فلم کا استعمال کیا جاتا ہے جس پر نوٹ چھاپا جاتا ہے۔ یہ نوٹ کاغذی نوٹوں سے زیادہ پائیدار ہوں گے اور جلدی خراب نہیں ہوں گے۔

حکومت پہلے ہی آر بی آئی کو 10 اور 20 روپے کے پولیمر نوٹ جاری کرنے کی اجازت دے چکی ہے۔ ابتدائی مرحلے میں پائلٹ پروجیکٹ کے تحت تقریبا دو ارب پلاسٹک کے نوٹ چھاپے جائیں گے۔ عام لوگوں سے ان کے معیار، استحکام اور تاثرات کا اندازہ لگانے کے لیے ان کی جانچ محدود پیمانے پر کی جائے گی۔

ہندوستھان سماچار

--------

ہندوستان سماچار / عبدالواحد