ممبئی، 5 اگست (ہ س)۔ مرکزی بینک آر بی آئی نے اس بار بھی اپنے پالیسی ساز شرح سود میں کوئی تبدیلی نہیں کی ہے۔ ریزرو بینک آف انڈیاکے گورنر سنجے ملہوترا نے بدھ کو یہاں ریپو ریٹ 5.25 فیصد پر برقرار رکھنے کا اعلان کیا۔ریزرو بینک کے اس فیصلے کی وجہ سے قرض کی شرح سود جوں کی توں رہے گی۔ آر بی آئی نے خوردہ افراط زر کی شرح کا تخمینہ کم کر کے 5 فیصد کر دیا ہے، جب کہ جی ڈی پی کی شرح نمو کا تخمینہ 6.7 فیصد کر دیا گیا ہے۔

گورنر ملہوترا نے مانیٹری پالیسی کمیٹی (ایم پی سی ) کی ہر دوماہ کے وقفے پر منعقد ہونے والی اس تین روزہ جائزہ میٹنگ کے فیصلے کے بارے میں آگاہ کیا۔ انہوں نے کہا کہ ایم پی سی نے سود کی موجودہ شرح کو برقرار رکھنے کا فیصلہ کیا ہے۔ موجودہ مالی سال 2026-27 کے تیسرے مالیاتی جائزے میں، مانیٹری پالیسی کمیٹی نے متفقہ طور پر پالیسی ریٹ ریپو ریٹ کو 5.25 فیصد پر برقرار رکھا ہے۔ سنجے ملہوترا نے کہا کہ ہندوستان دنیا میں سب سے تیزی سے ترقی کرنے والی بڑی معیشت ہے۔ ملک کی اقتصادی ترقی کی شرح کو مضبوط مانگ سے سہارا مل رہا ہے۔

ملہوترا نے کہا کہ مغربی ایشیا میں جاری بحران اہم تجارتی راستوں میں خلل کی وجہ سے عالمی معیشت کے لیے ایک چیلنج بنا ہوا ہے۔ انہوں نے کہا کہ خوردہ مہنگائی میں مستقبل قریب میں اضافہ ہوگا۔ تیسری سہ ماہی میں بلند ترین سطح پر پہنچنے کے بعداس میں کمی آئے گی۔ گورنر ملہوترا نے کہا کہ آر بی آئی نے رواں مالی سال 2026-27 کے لیے اپنی خوردہ افراط زر کے تخمینے کو 5.1 فیصد سے کم کر کے 5 فیصد کر دیا ہے۔

ہندوستانی معیشت نے رواں مالی سال کی اپریل-جون سہ ماہی میں توقع سے بہتر کارکردگی کا مظاہرہ کیا۔ گورنر نے کہا کہ آر بی آئی نے مالی سال 2026-27 کے لیے اپنی مجموعی گھریلو پیداوار (جی ڈی پی) کی شرح نمو 6.6 فیصد سے بڑھا کر 6.7 فیصد کر دی ہے۔

قابل ذکر ہے کہ آر بی آئی نے رواں مالی سال 2026-27 کے لیے اپنی دوسری مالیاتی پالیسی جائزہ میٹنگ جون میں منعقد کی تھی۔ اس میٹنگ میں ریپو ریٹ کو 5.25 فیصد پر رکھا گیا۔ اس مالی سال میں کل چھ اجلاس ہونے ہیں،یہ رواں مالی سال کا تیسرا جائزہ اجلاس ہے۔ پہلی جائزہ میٹنگ اپریل میں ہوئی تھی۔ فروری 2025 سے، آر بی آئی نے پالیسی ساز سود کی شرح، ریپو ریٹ میں کل 1.25فیصد کی کمی کی ہے، جس سے ریپو ریٹ 5.25فیصدپر ہے۔

ہندوستھان سماچار

ہندوستان سماچار / محمد شہزاد