تعلیم، سماجی ترقی اور ادارہ سازی کے میدان میں ان کی خدمات ہمیشہ یاد رکھی جائیں گی، راج ٹھاکرےممبئی ، 5 اگست (ہ س) مہاراشٹر نونرمان سینا کے صدر راج ٹھاکرے نے سابق گورنر، ممتاز ماہرِ تعلیم اور پدم شری اعزاز یافتہ آنجہانی ڈاکٹر ڈی وائی پاٹل کے انتقال پر گہرے رنج و غم کا اظہار کرتے ہوئے انہیں زبردست خراجِ عقیدت پیش کیا۔ انہوں نے کولہاپور پہنچ کر آنجہانی ڈاکٹر ڈی وائی پاٹل کی آخری رسومات سے قبل ان کے جسدِ خاکی کے دیدار کیے اور اہل خانہ سے تعزیت کا اظہار کیا۔ بعد ازاں انہوں نے سوشل میڈیا پر تعزیتی پیغام جاری کرتے ہوئے ڈاکٹر ڈی وائی پاٹل کی تعلیمی اور سماجی خدمات کو سراہا۔

راج ٹھاکرے نے اپنے پیغام میں کہا کہ آنجہانی ڈاکٹر ڈی وائی پاٹل کانگریس کے سینئر رہنما ہونے کے ساتھ ساتھ دور اندیش ماہرِ تعلیم بھی تھے، جنہوں نے تعلیمی اداروں کے قیام کے ذریعے معاشرے کی گرانقدر خدمت انجام دی۔ ان کے مطابق ڈاکٹر ڈی وائی پاٹل نے ایسے دور میں تعلیمی اداروں کی بنیاد رکھی، جب ملک میں اعلیٰ تعلیم، خصوصاً انجینئرنگ اور میڈیکل کالجوں کی شدید ضرورت تھی۔ انہوں نے کہا کہ آزادی کے بعد اگرچہ حکومت نے اعلیٰ تعلیم کے فروغ کے لیے متعدد اقدامات کیے، لیکن بڑھتی ہوئی آبادی اور پیشہ ورانہ تعلیم کی طلب کے پیش نظر صرف سرکاری وسائل کافی نہیں تھے۔ ایسے حالات میں نجی شعبے کے ذریعے معیاری تعلیمی اداروں کا قیام وقت کی اہم ضرورت بن گیا تھا۔

راج ٹھاکرے نے کہا کہ ڈاکٹر ڈی وائی پاٹل، پتانگ راؤ قدم، بالاصاحب وکھے پاٹل اور دتہ میگھے جیسے رہنماؤں نے تعلیمی شعبے میں ادارے قائم کر کے لاکھوں نوجوانوں کو ڈاکٹر، انجینئر، محقق، صنعت کار اور مختلف شعبوں کا ماہر بننے کا موقع فراہم کیا۔ ان کے مطابق یہ خدمات ملک کی ترقی میں ایک اہم سنگِ میل کی حیثیت رکھتی ہیں۔

انہوں نے مزید کہا کہ کسی بھی بڑے تعلیمی ادارے یا جامعہ کا قیام صرف عمارتوں کی تعمیر تک محدود نہیں ہوتا، بلکہ اس کے ساتھ طلبہ کی رہائش، اسپتال، چھوٹے کاروبار، ٹرانسپورٹ اور روزگار کے نئے مواقع بھی پیدا ہوتے ہیں، جس سے پورے علاقے کی معاشی اور سماجی ترقی ہوتی ہے۔ انہوں نے کہا کہ ڈاکٹر ڈی وائی پاٹل کے تعلیمی ادارے اور نوی ممبئی میں قائم اسٹیڈیم ان کی وسیع سوچ اور دور اندیشی کا واضح ثبوت ہیں۔

راج ٹھاکرے نے کہا کہ آنجہانی ڈاکٹر ڈی وائی پاٹل اس نسل کے نمایاں رہنماؤں میں شامل تھے، جنہوں نے سیاست کو محض اقتدار تک محدود رکھنے کے بجائے ادارہ سازی کے ذریعے معاشرے پر دیرپا نقوش چھوڑے۔ انہوں نے آنجہانی ڈاکٹر ڈی وائی پاٹل کو خراجِ عقیدت پیش کرتے ہوئے کہا کہ تعلیم اور سماجی خدمت کے میدان میں ان کی خدمات ہمیشہ یاد رکھی جائیں گی۔

ہندوستھان سماچار

--------------------

ہندوستان سماچار / جاوید این اے