ارریہ، 4 اگست (ہ س)۔ ایس ایس بی کی 56 ویں بٹالین کی امگچھی بیرونی سرحدی چوکی کے دستوں نے دو بنگلہ دیشی شہریوں کو گرفتار کیا ہے جو بغیر پاسپورٹ اور ویزا کے نیپال سے ہندوستان میں داخل ہوئے تھے۔ انہیں پیر کی رات معمول کی گشت کے دوران ہندوستان-نیپال بین الاقوامی سرحد کے قریب سے گرفتار کیا گیا۔حکام کے مطابق بتھناہا واقع ایس ایس بی کی 56ویں بٹالین کی بی کمپنی کے تحت امگاچھی بی او پی کے دستے سرحدی پیلر نمبر 174 کے قریب ہندوستانی سرحد پر گشت کر رہے تھے۔تفتیش کے دوران نیپال سے آنے والے دو مشکوک افراد کو روک کر پوچھ گچھ کی گئی۔ ان کی شناخت 43 سالہ رحمت علی اور 22 سالہ محمد جمال حسن کے طور پر ہوئی ہے، دونوں بنگلہ دیش کے چاند پور ضلع کے رہائشی ہیں۔

ابتدائی پوچھ گچھ کے دوران دونوں نے اعتراف کیا کہ وہ کاٹھمنڈو، نیپال سے ہندوستان میں بغیر پاسپورٹ اور ویزا کے داخل ہوئے تھے۔ انہوں نے بتایا کہ وہ کاٹھمنڈو میں کام کرتے تھے اور وہاں سے براٹ نگر پہنچے۔ اس کے بعد وہ دیہی راستوں سے ہندوستانی سرحد میں داخل ہوئے۔ ان کا ارادہ سلی گوڑی کوریڈور کے ذریعے آسام-بنگلہ دیش سرحد کے راستے اپنے ملک واپس جانے کا تھا۔ایس ایس بی کی 56ویں بٹالین کے سیکنڈ ان کمانڈ نتن گپتا نے بتایا کہ دونوں کو شک کی بنیاد پر حراست میں لیا گیا اور پوچھ گچھ کی گئی جس سے ان کی شناخت بنگلہ دیشی شہری کے طور پر ہوئی ہے۔ انہوں نے کہا کہ تفصیلی تفتیش جاری ہے۔ ضروری قانونی کارروائی مکمل کرنے کے بعد دونوں کو سونامونی گودام تھانہ کے حوالے کردیا گیا۔ارریہ صدر کے سب ڈویژنل پولیس آفیسر (ایس ڈی پی او) سشیل کمار نے بھی دو بنگلہ دیشی شہریوں کی گرفتاری کی تصدیق کی۔ انہوں نے کہا کہ سونامونی گودام تھانہ میں ان سے پوچھ گچھ کی جارہی ہے اور معاملے کے تمام پہلوؤں کی مکمل جانچ کی جارہی ہے۔ ابتدائی تحقیقات سے پتہ چلا ہے کہ دونوں آسام میں ہندوستان بنگلہ دیش سرحد کے راستے اپنے ملک واپس جانے کی کوشش کر رہے تھے۔

ہندوستھان سماچار

ہندوستان سماچار / Mohammad Afzal Hassan