ایس ایس پی کٹھوعہ نے منشیات اسمگلنگ کے معاملے میں پولیس اہلکار کو برطرف کیا
جموں، 04 اگست (ہ س)۔
کٹھوعہ پولیس نے منشیات کے خلاف جاری مہم کے تحت سخت کارروائی کرتے ہوئے منشیات اسمگلنگ کے ایک مقدمے میں ملوث سلیکشن گریڈ کانسٹیبل کو ملازمت سے برطرف کر دیا ہے۔سرکاری ذرائع کے مطابق ایس ایس پی کٹھوعہ موہیتا شرما نے سلیکشن گریڈ کانسٹیبل آفتاب احمد سکنہ پونی، ضلع ریاسی، کو محکمانہ تحقیقات مکمل ہونے کے بعد ملازمت سے برطرف کرنے کے احکامات جاری کیے ہیں۔
ذرائع کے مطابق آفتاب احمد کے خلاف پولیس اسٹیشن بلاور میں ایف آئی آر نمبر 55/2026 کے تحت این ڈی پی سی ایکٹ کی دفعات 8، 21، 22 اور 29 کے تحت مقدمہ درج کیا گیا تھا۔ اسے پولیس اسٹیشن بلاور کی ٹیم نے ناکہ چیکنگ کے دوران گرفتار کیا تھا، جہاں اس کے قبضے سے ہیروئن برآمد ہوئی تھی۔
واقعہ کے بعد مذکورہ اہلکار کو فوری طور پر معطل کر دیا گیا تھا اور معاملے کی محکمانہ تحقیقات ایس پی آپریشنز اپر کٹھوعہ کے سپرد کی گئی تھیں۔ تحقیقات میں الزامات ثابت ہونے کے بعد ایس ایس پی کٹھوعہ نے جموں و کشمیر پولیس رولز کے رول 335 کے تحت اسے فوری طور پر ملازمت سے برطرف کرنے کا حکم جاری کیا۔کٹھوعہ پولیس کا کہنا ہے کہ محکمہ منشیات کے خلاف زیرو ٹالرنس پالیسی پر عمل پیرا ہے اور ایسے معاملات میں ملوث کسی بھی اہلکار کے خلاف قانون اور قواعد کے مطابق سخت کارروائی عمل میں لائی جائے گی۔
ہندوستھان سماچار
ہندوستان سماچار / محمد اصغر
