نئی دہلی، 4 اگست (ہ س)۔ جنوب مغربی ضلع تھانہ کے ساؤتھ کیمپس پولیس اسٹیشن نے گھریلو ملازم کے ذریعہ کی گئی ہیرے کی چوری کا پردہ فاش کیا ہے اور دو مشتبہ افراد کو گرفتار کیا ہے۔ مشتبہ افراد کی شناخت 22 سالہ منیش چندرا ساکن الموڑہ، اتراکھنڈ اور 22 سالہ انکت کمار، مہیپال پور، دہلی کے رہائشی کے طور پر کی گئی ہے۔

پولیس نے ان کے قبضے سے مسروقہ ہیرا، ایک مسروقہ موبائل فون اور دو دیگر موبائل فون برآمد کر لیے۔ ان میں سے ایک موبائل فون میں چوری شدہ ہیرے کی تصاویر تھیں جو ممکنہ خریداروں کو بھیجی گئی تھیں۔

پولیس کے مطابق مرکزی ملزم منیش چندر نے 12ویں جماعت کی تعلیم حاصل کی ہے اور وہ ہاؤس کیپنگ اسٹاف ممبر کے طور پر کام کرتا تھا۔ وہ ابھی کچھ دن پہلے ہی شکایت کنندہ کے گھر پر ملازم ہوا تھا۔ اس کے ساتھی، انکت کمار نے 11ویں جماعت کی تعلیم حاصل کی ہے اور وہ مہیپال پور کے ایک ہوٹل میں ہاؤس کیپنگ اسٹاف ممبر کے طور پر کام پر رکھا گیا تھا۔ پولیس کا کہنا ہے کہ انکت نے منیش کو چوری شدہ ہیرا بیچنے میں مدد کی تھی۔

پولیس کے مطابق 10 جولائی 2026 کو ایک خاتون نے ساؤتھ کیمپستھانہ میں شکایت درج کروائی جس میں الزام لگایا گیا کہ اس کے گھریلو ملازم منیش چندر نے ایک قیمتی ہیرا چرا لیا ہے۔ شکایت کی بنیاد پربھارتیہ نیائے سنہتا (آئی پی سی) کی دفعہ 306 کے تحت مقدمہ درج کیا گیا اور تحقیقات شروع کی گئی۔

تحقیقات کے دوران یہ بات سامنے آئی کہ منیش نے گھر میں نوکری شروع کرنے کے چند دن بعد ہی ہیرا چوری کر لیا ۔ چوری کے فوراً بعد وہ نوکری چھوڑ کر فرار ہو گیا۔ اس نے کئی مقامات پر ہیرے کوفروخت کرنے کی کوشش کی لیکن کوئی خریدار نہ مل سکا۔ اس کے بعد اس نے اپنے جاننے والے انکت کمار سے رابطہ کیا۔ انکت نے خریدار تلاش کرنے کے لیے اپنے موبائل فون کا استعمال کرتے ہوئے کئی لوگوں کو چوری شدہ ہیرے کی تصاویر بھیجیں۔

ساؤتھ کیمپس تھانے نے معاملے کی تحقیقات کے لیے ایک خصوصی ٹیم تشکیل دی تھی۔ ٹیم نے الیکٹرانک سرویلانس، تکنیکی تجزیہ اور مخبر نیٹ ورک کا استعمال کرتے ہوئے ملزم کی تلاش شروع کی۔ تحقیقات کے دوران پولیس نے دہلی کے ساتھ ساتھ حیدرآباد اور الموڑہ، اتراکھنڈ کے کئی مقامات پر چھاپے مارے۔ مسلسل کوششوں اور قابل اعتماد معلومات کی بنیاد پر، پولس نے جنوب مغربی دہلی کے نانک پورہ، موتی باغ علاقے سے دونوں ملزمان کو گرفتار کیا۔

پولیس پوچھ گچھ کے دوران منیش چندر نے ہیرا چوری کرنے کا اعتراف کیا۔ اس کے کہنے پر چوری شدہ ہیرا برآمد ہوا۔ تلاشی کے دوران اس کے قبضے سے ایک موبائل فون بھی برآمد ہوا جس کا تعلق کملا مارکیٹ تھانے کی حدود میں درج ایک اور چوری کے مقدمہ سے ہے۔ اس کے علاوہ ایک اور موبائل فون برآمد ہوا، جس کی اصل ملکیت کی تحقیقات کی جا رہی ہیں۔

ہندوستھان سماچار

ہندوستان سماچار / محمد شہزاد