اے ایم یو کے پولی ٹیکنک میں ڈپلوما انجینئرنگ کے طلبہ کے لیے تین روزہ انڈکشن پروگرام منعقد

علی گڑھ، 04 اگست (ہ س)۔ علی گڑھ مسلم یونیورسٹی کے پولی ٹیکنک میں نئے داخلہ لینے والے ڈپلوما انجینئرنگ سالِ اوّل کے طلبہ کو یونیورسٹی کے تعلیمی ماحول، ادارہ جاتی سہولیات، کیمپس کی ثقافت اور طلبہ کی معاونتی خدمات سے روشناس کرانے کے لیے 30 جولائی تا یکم اگست تین روزہ انڈکشن پروگرام منعقد کیا گیا۔ افتتاحی اجلاس کی صدارت کرتے ہوئے پرو وائس چانسلر پروفیسر محمد محسن خان نے طلبہ کو لگن، نظم و ضبط اور دیانت داری کے ساتھ تعلیمی میدان میں بہترین کارکردگی کا مظاہرہ کرنے کی تلقین کی ۔ انھوں نے ملک کی تعمیر میں تکنیکی تعلیم کے اہم کردار پر روشنی ڈالی۔

ڈین اسٹوڈنٹس ویلفیئر پروفیسر ایم اطہر انصاری نے طلبہ کو یونیورسٹی کی فلاحی اسکیموں، مشاورتی خدمات، وظائف اور ہم نصابی سرگرمیوں سے آگاہ کیا، نیز جسمانی اور ذہنی صحت کی اہمیت پر زور دیا۔ یونیورسٹی پراکٹر پروفیسر محمد نوید خان نے طلبہ کو کیمپس کے نظم و ضبط اور اینٹی ریگنگ ضوابط سے آگاہ کیا، جبکہ ڈین، فیکلٹی آف انجینئرنگ اینڈ ٹکنالوجی پروفیسر نثار احمد نے انہیں اختراع، اخلاقیات اور پیشہ ورانہ امتیاز کو اپنانے کی تلقین کی۔ شعبہ قانون کے پروفیسر وسیم علی نے آئینی اقدار، سماجی ذمہ داری اور اخلاقی طرزِ عمل کے موضوع پر طلبہ کی رہنمائی کی۔

اس سے قبل یونیورسٹی پولی ٹیکنک کے پرنسپل پروفیسر مجیب احمد انصاری نے مہمانوں، سرپرستوں، اساتذہ اور طلبہ کا خیرمقدم کرتے ہوئے پولی ٹیکنک کے تعلیمی پروگراموں، بنیادی ڈھانچے، نمایاں دستیابیوں اور مستقبل کے وژن کا جامع تعارف پیش کیا۔ پروگرام کے دوران یونیورسٹی کے عہدیداران اور اساتذہ نے تعلیمی ضوابط، امتحانات، ٹریننگ و پلیسمنٹ، لائبریری خدمات، این ایس ایس، این سی سی، طلبہ کی سوسائٹیز اور ہم نصابی سرگرمیوں سے متعلق مختلف سیشن منعقد کیے۔ تعلیمی شعبوں کے انچارجوں نے طلبہ کو اپنے اپنے شعبوں، نصاب، تجربہ گاہوں اور تعلیمی توقعات سے بھی آگاہ کیا۔

انڈکشن پروگرام کے ایک حصے کے طور پر طلبہ نے پولی ٹیکنک کی ورکشاپ، لائبریری، فزکس اور کیمسٹری کی تجربہ گاہوں، نیز اپنی اپنی انجینئرنگ شاخوں سے متعلق خصوصی لیباریٹریوں اور ورکشاپ کا دورہ کیا، جہاں انہوں نے اساتذہ سے گفتگو کی اور ادارے میں دستیاب عملی اور تکنیکی سہولیات کا براہِ راست مشاہدہ کیا۔

ہندوستھان سماچار

---------------

ہندوستان سماچار / سید کامران علی گڑھ