ممبئی، 4 اگست (ہ س)۔ مرزاپور: دی مووی کا پہلا گانا’’دو نمبری‘‘ ریلیز کر دیا گیا ہے۔ علی فضل اور پنکج ترپاٹھی کی اداکاری سے مزین اس انتہائی متوقع فلم کو لے کر شائقین میں پہلے ہی زبردست جوش و خروش پایا جا رہا ہے۔ ایمیزون پرائم ویڈیو پر تین کامیاب سیزن کے بعد اب مرزاپور کی دنیا بڑے پردے پر آنے کے لیے تیار ہے۔ گانے کی ریلیز کے ساتھ ہی سوشل میڈیا پر بھی اس کے چرچے شروع ہو گئے ہیں۔اس گانے کی خاص بات یہ ہے کہ یہ فرحان اختر کے نئے میوزک لیبل ایکسل میوزک کے تحت جاری ہونے والا پہلا گانا ہے۔

یونیورسل میوزک گروپ (یو ایم جی)کے اشتراک سے ریلیز ہونے والے ’دو نمبری‘ کو ہریانوی ریپر دھانڈا نیولی والا نے گایا، لکھا اور کمپوز کیا ہے۔ اس گیت کے ذریعے انہوں نے بالی ووڈ میں بطور گلوکار اور موسیقار اپنی شروعات کی ہے۔ گانے کے میوزک ویڈیو میں بھی دھانڈا نیولی والا اپنی منفرد انداز میں نظر آتے ہیں۔ دیسی رنگ اور طاقتور ریپ سے مزین اس گانے کو فلم کی تشہیری مہم کا ایک اہم حصہ قرار دیا جا رہا ہے۔

ہدایت کار گرمیت سنگھ کی ہدایت میں بننے والی مرزاپور: دی مووی میں پنکج ترپاٹھی، علی فضل، دیویندو، رسیکا دگل اور ابھیشیک بنرجی سمیت کئی معروف فنکار مرکزی کرداروں میں نظر آئیں گے۔ویب سیریز کی غیر معمولی کامیابی کے بعد شائقین کو فلم سے بھی بڑی توقعات وابستہ ہیں۔ مرزاپور: دی مووی 4 ستمبر 2026 کو دنیا بھر کے سینما گھروں میں ریلیز کی جائے گی۔

ہندوستھان سماچار

ہندوستان سماچار / Mohammad Khan