نئی دہلی، 4 اگست (ہ س)۔ سرکاری شعبے کی بیمہ کمپنی لائف انشورنس کارپوریشن آف انڈیا (ایل آئی سی) کی آفر فار سیل(او ایف ایس) کو منگل کی دوپہر تک ادارہ جاتی سرمایہ کاروں کے لیے مختص زمرے میں 66.10 فیصد سبسکرپشن حاصل ہوئی۔ مرکزی حکومت نے او ایف ایس کے تحت شیئرز کی فروخت کے لیے کم از کم 382 روپے فی شیئر کی فلور پرائس مقرر کی ہے۔

اسٹاک ایکسچینج کے جاری کردہ اعداد و شمار کے مطابق ادارہ جاتی سرمایہ کاروں نے 382.07 روپے فی شیئر کی اشاریہ جاتی قیمت پر 18.81 کروڑ سے زائد شیئرز کے لیے بولیاں لگائیں، جو ان کے لیے مختص حصے کا 66.10 فیصد ہے۔ مرکزی حکومت ادارہ جاتی سرمایہ کاروں کے لیے ایل آئی سی کے 28.46 کروڑ سے زائدشیئرز کم از کم 382 روپے فی شیئر کی قیمت پر فروخت کر رہی ہے۔

خوردہ سرمایہ کار بدھ کے روز اس پیشکش کے لیے بولیاں لگا سکیں گے۔ حکومت ملک کی سب سے بڑی بیمہ کمپنی ایل آئی سی میں اپنی 6.5 فیصد حصہ داری، یعنی 82.22 کروڑ سے زائد کے شیئرز، کم از کم 382 روپے فی شیئر کی قیمت پر فروخت کر رہی ہے۔ اس شیئرز فروخت سے حکومت کو تقریباً 31 ہزار کروڑ روپے حاصل ہونے کی توقع ہے۔ اس اقدام سے ایل آئی سی کو مقررہ مدت سے پہلے کم از کم عوامی حصہ داری (کم ازکم عوامی شیئرہولڈنگ کی شرط پوری کرنے میں بھی مدد ملے گی۔

وزارتِ خزانہ کے تحت محکمہ سرمایہ کاری و عوامی اثاثہ جات کے انتظام نے سوشل میڈیا پلیٹ فارم ایکس پر جاری ایک پوسٹ میں بتایا کہ حکومت ابتدائی طور پر ایل آئی سی میں 2.5 فیصدشیئرز فروخت کرنے کی پیشکش کر رہی ہے۔ اس کے علاوہ گرین شو آپشن کے تحت مزید 4 فیصد شیئرز بھی فروخت کیے جا سکتے ہیں۔ اس کے لیے فلور پرائس 382 روپے فی شیئر مقرر کی گئی ہے۔ اس اقدام سے کم از کم عوامی حصہ داری(ایم پی ایس) کے ہدف کو مقررہ وقت سے پہلے حاصل کرنے میں مدد ملے گی۔

قابلِ ذکر ہے کہ سرمایہ بازار کے نگران ادارے سیبی نے ایل آئی سی کو کم از کم 10 فیصد عوامی حصہ داری حاصل کرنے کے لیے 16 مئی 2027 تک کی مہلت دی ہے۔ اس وقت ایل آئی سی میں حکومت کی حصہ داری 96.5 فیصد ہے۔

ہندوستھان سماچار

ہندوستان سماچار / Mohammad Khan