رانچی، 4 اگست (ہ س)۔ جھارکھنڈ ہائی کورٹ نے نیٹ-یو جی 2026 کی دوبارہ منعقدہ امتحان میں نمبروں کی مبینہ بے ضابطگی سے متعلق لکشیہ سنگھ کی دائر کردہ عرضی نمٹا دی۔ عدالت کی ہدایت پر نیشنل ٹیسٹنگ ایجنسی (این ٹی اے) نے متعلقہ امیدوار کی اصل او ایم آر شیٹ سیل بند لفافے میں عدالت کے روبرو پیش کی۔ اس کے بعد درخواست گزار کی جانب سے عرضی واپس لینے کی استدعا کی گئی، جسے قبول کرتے ہوئے عدالت نے عرضی خارج کر دی۔
اس معاملے کی سماعت جسٹس آنند سین کی عدالت میں ہوئی۔ گزشتہ سماعت کے دوران عدالت نے این ٹی اے سے سوال کیا تھا کہ اگر امیدوار لکشیہ سنگھ کی ویب سائٹ پر اپ لوڈ کی گئی او ایم آر شیٹ کے مطابق اس کے 720 میں سے 660 نمبر بنتے ہیں تو پھر جاری کردہ نتیجے میں اسے صرف 116 نمبر کیسے دیے گئے۔ اس کے بعد عدالت نے این ٹی اے کو ہدایت دی تھی کہ متعلقہ امیدوار کی اصل او ایم آر شیٹ سیل بند لفافے میں پیش کرے۔ عدالت نے ٹیسٹ بک لیٹ (سیریل نمبر: 265208914) اور رول نمبر 2603107066 سے متعلق اصل ریکارڈ بھی پیش کرنے کا حکم دیا تھا۔
درخواست گزار کی جانب سے عدالت کو بتایا گیا تھا کہ این ٹی اے کی ویب سائٹ پر دستیاب او ایم آر شیٹ کو اسکین کرنے پر امیدوار کے 720 میں سے 660 نمبر بنتے تھے، جبکہ جاری کردہ نتیجے میں اسے صرف 116 نمبر دیے گئے تھے۔ اسی بنیاد پر اصل او ایم آر شیٹ طلب کرنے کی درخواست کی گئی تھی تاکہ حقیقت حال واضح ہو سکے۔
قابلِ ذکر ہے کہ لکشیہ سنگھ نے نیٹ-یو جی 2026 کی دوبارہ منعقدہ امتحان میں کم نمبر دیے جانے کو چیلنج کرتے ہوئے جھارکھنڈ ہائی کورٹ میں عرضی دائر کی تھی۔ تاہم، این ٹی اے کی جانب سے اصل او ایم آر شیٹ پیش کیے جانے کے بعد درخواست گزار نے اپنی عرضی واپس لینے کی استدعا کی، جسے عدالت نے قبول کرتے ہوئے عرضی خارج کر دی۔
ہندوستھان سماچار
ہندوستان سماچار / Mohammad Khan
