پٹنہ، 4 اگست (ہ س)۔ وزیر اعلی سمراٹ چودھری نے منگل کے روز دانا پور پٹنہ میں ناصری گنج گھاٹ اور پاناپور گھاٹ کے درمیان مفت اسٹیمر (فیری) سروس کو جھنڈی دکھا کر روانہ کیا۔تقریب میں ضلع مجسٹریٹ کدن کمار نے وزیر اعلیٰ کو اسٹیمر (فیری) سروس کے بارے میں تفصیلی جانکاری فراہم کی۔ پروگرام کے دوران وزیر اعلیٰ نے اسٹیمر کا معائنہ کیا اور اسٹیمرمیں سوار مسافروں سے ملاقات کی۔ مقامی عوامی نمائندوں، رہنماؤں نے وزیر اعلیٰ کا گلدستے اور ہار پہنا کر استقبال کیا۔اس موقع پر وزیر اعلیٰ نے کہا کہ ناصری گنج-پاناپور اسٹیمر فیری سروس سے نقل و حمل میں نمایاں سہولت ملے گی اور اقتصادی سرگرمیوں کو فروغ ملے گا۔ یہ ا سٹیمر فیری سروس مکمل طور پر مفت ہے۔ا سٹیمر فیری سروس کے آغاز سے دانا پور بلاک کے دیارہ علاقے کے لوگوں کو گنگا کو عبور کرنے میں کافی سہولت ملے گی۔ اس کے علاوہ فیری سروس سے دیارہ کے علاقے میں سبزیوں، پھلوں، ڈیری پروڈیوسروں اور کسانوں کو فائدہ پہنچے گا۔ زرعی اور دودھ کی مصنوعات کو مارکیٹ تک پہنچانے میں آسانی سے مقامی تجارت کو فروغ ملے گا اور خطے میں اقتصادی سرگرمیوں کو فروغ ملے گا۔

یہ سروس مانسون کے موسم میں علاقے کے لوگوں کے لیے انتہائی مفید ثابت ہوگی۔ اسٹیمر فیری سروس سے دانا پور بلاک کے دیارہ علاقے میں چھ گرام پنچایتوں کے لوگوں کو براہ راست فائدہ پہنچے گا۔دیارہ علاقے سے دانا پور تک سفر کے لیے گنگا ندی پر پیپا پل عام طور پر نومبر سے 15 جون تک کام کرتا ہے۔ باقی ماندہ مدت کے دوران پیپا پل کے ہٹائے جانے کی وجہ سے مقامی باشندوں کو مانسون کے موسم میں گنگا کو عبور کرنے میں خاصی مشکلات اور خطرات کا سامنا کرنا پڑتا ہے۔اسٹیمر فیری سروس کے متعارف ہونے سے اس دوران سفر آسان اور محفوظ ہو جائے گا۔ اس وقت دیارہ کے علاقے میں 58 اسکول کام کر رہے ہیں، جن میں 553 اساتذہ اور عملہ کام کر رہا ہے۔

اس کے علاوہ علاقے میں 95 آنگن باڑی مراکز، 3 صحت کے ذیلی مراکز، اور پنچایت دفاتر میں 190 آنگن باڑی کارکنان اور مددگار کام کر رہے ہیں۔ فیری سروس شروع ہونے سے ان اداروں میں کام کرنے والے اساتذہ، عملہ، آنگن باڑی ورکرس، ہیلتھ ورکر اور پنچایت ورکروں کو بھی اپنے کام کی جگہوں پر آنے جانے کی سہولت حاصل ہوگی۔ پانی کی نقل و حمل کے بہتر استعمال کے ساتھ گنگا کے دونوں کناروں پر رہنے والے لوگوں کے پاس ایک اضافی اور آسان نقل و حمل کا آپشن بھی ہوگا۔اس موقع پر نائب وزیر اعلیٰ وجے کمار چودھری، وزیر کواآپریٹو رام کرپال یادو، قانون ساز کونسلر انامیکا سنگھ، وزیر اعلیٰ کے پرنسپل سکریٹری دیپک کمار، وزیر اعلیٰ کے سکریٹری سنجے کمار سنگھ، ضلع مجسٹریٹ کندن کمار، پولیس کے سینئر سپرنٹنڈنٹ کارتکیہ کے شرما کے علاوہ دیگر معززین اور مقامی شہری موجود تھے۔

ہندوستھان سماچار

ہندوستان سماچار / Mohammad Afzal Hassan