پٹنہ،31اگست(ہ س)۔بہارمیں مانسون سرگرم ہے، لیکن اس کے باوجود اچھی بارش نہ ہونے کی وجہ سے لوگوں کو پریشانی کا سامنا ہے۔ دریں اثنا محکمہ موسمیات نے آج پوری ریاست بہار کے لیے الرٹ جاری کیا ہے۔ محکمہ موسمیات نے مشرقی چمپارن، مغربی چمپارن، گوپال گنج، سیوان، سارن، بکسر، بھوجپور، ارول، اورنگ آباد، روہتاس اور کیمور کے لیے اورنج الرٹ جاری کیا ہے۔باقی اضلاع کے لیے یلو الرٹ جاری کیا گیا ہے۔ اس دوران 30 سے40 کلومیٹر فی گھنٹہ کی رفتار سے ہوائیں چل سکتی ہیں۔ کچھ علاقوں میں موسلادھار بارش ہو سکتی ہے جبکہ دیگر علاقوں میں ہلکی بارش ہو سکتی ہے۔ آسمانی بجلی گرنے کا بھی امکان ہے۔ محکمہ موسمیات کے مطابق بکسر، اورنگ آباد، روہتاس اور کیمور میں آج موسم مزید شدید رہنے کا امکان ہے۔بہار میں مانسون سیزن کے تین ماہ گزرنے کے بعد بھی بارش کی کمی برقرار ہے۔ اگست (ساون) کے آخری دنوں میں جہاں کچھ علاقوں میں اچھی بارش ہوئی، وہیں اس سے ریاست بھر میں بارش کی کمی پوری نہیں ہوئی۔ محکمہ موسمیات کے اعداد و شمار کے مطابق ریاست کے 11 اضلاع میں معمول سے 50 فیصد یا اس سے زیادہ کم بارش ہوئی ہے۔ اس لیے اب سب کی نظریںبھادو میں ہونے والی بارش پر لگی ہوئی ہیں۔ماہرین موسمیات کے مطابق بھادو (ستمبر) میں بھی مانسون کے مکمل طور پر سازگار ہونے کا امکان نہیں ہے۔ دستیاب پیشین گوئیاں بتاتی ہیں کہ ستمبر میں بارش معمول سے کم اور ناہموار ہوگی۔ بھادو کے پہلے ہفتے کے دوران کئی علاقوں میں بارش ہو گی تاہم بارش میں بتدریج کمی آئے گی۔جہان آباد میں مانسون کے موسم میں معمول سے تقریباً 64 فیصد کم بارش ہوئی ہے۔ شیخ پورہ اور سیتامڑھی میں تقریباً 60 فیصد بارش ہوئی ہے، جبکہ بھاگلپور، بھوجپور اور جموئی میں تقریباً 55 فیصد کم بارش ریکارڈ کی گئی ہے۔ مظفر پور میں 52 فیصد، پٹنہ میں 51 فیصد، دربھنگہ میں 53 فیصد، سارن میں 51 فیصد اور سہرسہ میں تقریباً 50 فیصد کم بارش ہوئی ہے۔ اس کے علاوہ 24 اضلاع میں معمول سے 25 فیصد سے 49فیصد کم بارش ہوئی ہے۔گزشتہ 24 گھنٹوں میں اورنگ آباد، سیوان، سمستی پور اور سپول میں مختلف مقامات پر موسلادھار بارش ریکارڈ کی گئی۔ اورنگ آباد کے اوبرا میں 82.8 ملی میٹر، سپول کے ویرپور میں 82 ملی میٹر اور سمستی پور کے حسن پور میں 70 ملی میٹر بارش ہوئی۔ محکمہ موسمیات کے مطابق بہار کے کئی حصوں میں 31 اگست سے ستمبر کے شروعاتی دنوں تک بارش کی سرگرمیاں جاری رہنے کی توقع ہے۔ہندوستھان سماچار

ہندوستان سماچار / Mohammad Afzal Hassan