لکھنؤ، 3 اگست (ہ س)۔ اتر پردیش قانون ساز اسمبلی کے مانسون اجلاس کے آغاز سے قبل پیر کی صبح 10 بجے سماجوادی پارٹی (ایس پی)کے اراکینِ اسمبلی نے ودھان بھون میں واقع سابق وزیر اعظم چودھری چرن سنگھ کے مجسمے کے سامنے دھرنا دیا اور ریاستی حکومت کے خلاف نعرے بازی کی۔دھرنے میں شامل اراکین اسمبلی کے ہاتھوں میں حکومت مخالف نعرے درج پلے کارڈز اور پوسٹرز تھے۔ ان پوسٹروں پر نیٹ امتحان کے پرچہ لیک معاملے، رام مندر چڑھاوا چوری ، اساتذہ کی بھرتی، پرانی پنشن اسکیم کی بحالی، مہنگائی اور کسانوں کے مسائل سے متعلق نعرے تحریر تھے۔سماجوادی پارٹی کے سینئر رہنما اور سابق وزیر اوم پرکاش سنگھ نے کہا کہ ریاست کا کسان، نوجوان اور تاجر سبھی پریشان ہیں۔ ان کے بقول موجودہ حکومت عوامی جذبات کے مطابق نہیں چل رہی بلکہ صرف انتظامی سوچ کے تحت فیصلے کر رہی ہے۔انہوں نے الزام لگایا کہ اسی حکومت کے دور میں رام مندر چڑھاواچوری کا واقعہ پیش آیا، جس سے عوام کے اعتماد کو ٹھیس پہنچی ہے۔ اوم پرکاش سنگھ نے کہا کہ حکومت نے اسمبلی کا صرف چار روزہ اجلاس طلب کیا ہے، جس سے ظاہر ہوتا ہے کہ وہ عوامی مسائل پر سنجیدہ بحث نہیں چاہتی۔انہوں نے کہا کہ انہی عوامی اور عوامی مفاد سے متعلق مسائل کو اجاگر کرنے کے لیے سماجوادی پارٹی کے اراکین نے دھرنا دیا ہے۔ہندوستھان سماچار

ہندوستان سماچار / Mohammad Khan