جموں, 03 اگست (ہ س)۔ جموں و کشمیر کے ضلع پونچھ کے دو سرحدی دیہات میں پیر کے روز دو ناکارہ مارٹر گولے برآمد ہوئے، جنہیں فوج کے بم ناکارہ بنانے والے دستے نے تمام حفاظتی اقدامات کے ساتھ محفوظ طریقے سے تباہ کر دیا۔

سرکاری ذرائع کے مطابق پہلا مارٹر گولا منکوٹ علاقے میں چجلہ پل کے قریب ایک کھلے میدان سے برآمد ہوا۔ مقامی لوگوں نے گولہ دیکھتے ہی پولیس اور سیکورٹی فورسز کو اطلاع دی، جس کے بعد فورسز نے موقع پر پہنچ کر علاقے کو گھیرے میں لے لیا۔ بعد ازاں فوج کے بم ناکارہ بنانے والے دستے نے موقع پر پہنچ کر گولے کا معائنہ کیا اور کنٹرولڈ دھماکے کے ذریعے اسے ناکارہ بنا دیا۔

اسی دوران دوسرا ناکارہ مارٹر گولا مینڈھر نالہ کے نزدیک آدھکی گاؤں کے زرعی کھیتوں سے برآمد ہوا، جسے بھی فوجی ماہرین نے محفوظ طریقے سے تباہ کر دیا۔

حکام کے مطابق ابتدائی تحقیقات سے معلوم ہوتا ہے کہ یہ مارٹر گولے ماضی میں لائن آف کنٹرول پر ہونے والی سرحد پار گولہ باری کے دوران کے باقی ماندہ دھماکہ خیز مواد ہیں۔ واقعے میں کسی جانی یا مالی نقصان کی اطلاع نہیں ہے۔

ہندوستھان سماچار

---------------

ہندوستان سماچار / محمد اصغر