جلگاؤں، 3 اگست (ہ س): مسافروں کی بڑھتی ہوئی بھیڑ کے پیش نظر سینٹرل ریلوے نے ممبئی سے داناپور کے لیے بھساول کے راستے ایک خصوصی ٹرین چلانے کا اعلان کیا ہے۔ اس خصوصی ٹرین سے بہار جانے والے مسافروں کو بڑی سہولت حاصل ہوگی۔ سینٹرل ریلوے کے مطابق ٹرین نمبر 02081 پانچ اگست کو رات 12:30 بجے چھترپتی شیواجی مہاراج ٹرمینس، ممبئی سے روانہ ہوگی اور اگلے روز صبح 8 بجے داناپور پہنچے گی۔

یہ خصوصی ٹرین دادر، تھانے، کلیان، اگت پوری، ناسک روڈ، منماڑ، بھساول، کھنڈوا، اٹارسی، جبل پور، کٹنی، ستنا، پریاگ راج چھیونکی، پنڈت دین دیال اُپادھیائے جنکشن، بکسر اور آرا اسٹیشنوں پر رکے گی، جس سے شمالی ہند، خصوصاً بہار جانے والے مسافروں کو سہولت میسر آئے گی۔ ریلوے حکام کے مطابق ٹرین میں 12 سلیپر کوچ اور 8 جنرل کوچ شامل ہوں گے، تاکہ ریزرویشن والے اور عام دونوں طرح کے مسافروں کے لیے مناسب سفری سہولت فراہم کی جا سکے۔سینٹرل ریلوے نے بتایا کہ اس خصوصی ٹرین کے لیے ریزرویشن تمام کمپیوٹرائزڈ اور مجاز ریلوے ریزرویشن مراکز کے علاوہ آن لائن بھی دستیاب ہوگا۔

ہندوستھان سماچار

--------------------

ہندوستان سماچار / جاوید این اے