نئی دہلی، 3 اگست (ہ س)۔ مرکزی وزیر برائے امورِ نوجواں و کھیل منسکھ مانڈویہ نے دولتِ مشترکہ کھیل 2026 میں بھارتی دستے کی شاندار کارکردگی پر کھلاڑیوں، کوچز اور معاون عملے کو مبارک باد دیتے ہوئے کہا ہے کہ محدود کھیلوں پر مشتمل اس ایڈیشن میں بھی بھارت نے اپنی بڑھتی ہوئی کھیلوں کی طاقت کا بھرپور مظاہرہ کیا ہے۔ انہوں نے یقین ظاہر کیا کہ سال 2030 میں احمد آباد میں منعقد ہونے والے دولتِ مشترکہ کھیلوں کے صد سالہ ایڈیشن کو بھارت تاریخ کے یادگار ترین مقابلوں میں شامل کرے گا۔

منسکھ مانڈویہ نے سوشل میڈیا پلیٹ فارم ایکس پر لکھا، ’بھارت نے دولتِ مشترکہ کھیل 2026 کا اختتام شاندار انداز میں چوتھی پوزیشن حاصل کرتے ہوئے کیا۔‘ گلاسگو 2026 کا یہ ایڈیشن محدود کھیلوں پر مشتمل تھا اور اس میں کئی ایسے کھیل شامل نہیں تھے جن میں بھارت روایتی طور پر مضبوط رہا ہے۔ اس کے باوجود بھارتی دستے نے برمنگھم 2022 میں انہی کھیلوں میں حاصل کیے گئے 30 تمغوں کے مقابلے میں اس بار 39 تمغے جیت کر نمایاں بہتری کا مظاہرہ کیا ہے۔‘‘

انہوں نے کہا، ’وزیر اعظم نریندر مودی کی قیادت میں بھارتی کھیلوں کی گہرائی اور مضبوطی مسلسل بڑھ رہی ہے۔ ہمیں ہر اس کھلاڑی، کوچ اور معاون عملے پر فخر ہے جنہوں نے ترنگے کی سربلندی کے لیے اپنی بہترین صلاحیتوں کا مظاہرہ کیا۔‘

مانڈویہ نے مزید کہا، ’اب جبکہ بھارت 2030 میں دولتِ مشترکہ کھیلوں کے صد سالہ ایڈیشن کی میزبانی کی تیاری کر رہا ہے، ہمارا عزم ہے کہ ہم کھیلوں کی تاریخ کے بہترین اور یادگار ترین مقابلوں میں سے ایک کا انعقاد کریں گے۔‘

گلاسگو دولتِ مشترکہ کھیلوں میں بھارت نے مجموعی طور پر 39 تمغے جیت کر تمغوں کی فہرست میں چوتھا مقام حاصل کیا۔ بھارتی کھلاڑیوں نے 13 طلائی، 17 چاندی اور 9 کانسہ کے تمغے اپنے نام کیے۔ محدود کھیلوں کے باوجود بھارت نے باکسنگ، ایتھلیٹکس، جوڈو، پیرا اسپورٹس اور ویٹ لفٹنگ میں شاندار کارکردگی کا مظاہرہ کرتے ہوئے اپنی مضبوط موجودگی کا احساس دلایا۔

تمغوں کی فہرست میں آسٹریلیا 70 طلائی تمغوں سمیت مجموعی طور پر 171 تمغوں کے ساتھ پہلے نمبر پر رہا، جبکہ انگلینڈ 110 تمغوں کے ساتھ دوسرے اور کینیڈا 62 تمغوں کے ساتھ تیسرے مقام پر رہا۔ میزبان اسکاٹ لینڈ نے بھی 39 تمغے حاصل کیے، لیکن بھارت کے مقابلے میں چاندی کے کم تمغوں کی وجہ سے اسے پانچویں مقام پر اکتفا کرنا پڑا۔گیارہ روز تک جاری رہنے والے ان کھیلوں میں بھارتی کھلاڑیوں کی شاندار کارکردگی نے ایک بار پھر ثابت کر دیا کہ بھارت دولتِ مشترکہ ممالک کی نمایاں کھیل طاقتوں میں شامل ہے اور اب اس کی نظریں احمد آباد 2030 میں کامیاب میزبانی کے ساتھ ساتھ مزید بہتر کارکردگی پر مرکوز ہیں۔

ہندوستھان سماچار

ہندوستان سماچار / Mohammad Khan