ممبئی، 3 اگست (ہ س)۔ بالی ووڈ سپر اسٹار سلمان خان نے آخرکار اپنی زبردست فٹنس ٹرانسفارمیشن سے متعلق جاری قیاس آرائیوں پر خاموشی توڑتے ہوئے انکشاف کیا ہے کہ انہوں نے اپنی آنے والی فلم ’ایس وی سی 63‘ کے لیے 16 کلوگرام وزن کم کیا ہے۔ گزشتہ چند ماہ سے سوشل میڈیا پر ان کے بدلے ہوئے روپ کو لے کر مختلف چہ مگوئیاں جاری تھیں اور خیال کیا جا رہا تھا کہ وہ نئی فلم کے کردار کی تیاری کر رہے ہیں۔

سلمان خان نے یہ انکشاف اپنے بھائی سہیل خان کے ریئلٹی شو ’الائنس‘ میں شرکت کے دوران کیا، جہاں وہ ان کی حوصلہ افزائی کے لیے پہنچے تھے۔

شو کے دوران سلمان نے مزاحیہ انداز میں سہیل سے کہا کہ ان کا وزن کم ہو گیا ہے۔ اس پر سہیل نے فخر سے بتایا کہ انہوں نے 12 کلوگرام وزن کم کیا ہے۔ جواب میں سلمان خان نے مسکراتے ہوئے کہا، ’میں نے 16 کلو وزن کم کیا ہے۔‘ ان کے اس بیان کے بعد ان کی فٹنس ٹرانسفارمیشن سے متعلق جاری تمام قیاس آرائیاں ختم ہو گئیں۔

گزشتہ کچھ عرصے سے سلمان خان مسلسل جم میں ورزش کرتے ہوئے اپنی تصاویر اور ویڈیوز سوشل میڈیا پر شیئر کر رہے ہیں، جنہیں مداحوں کی جانب سے بھرپور پذیرائی ملی ہے۔اگر ان کے فلمی منصوبوں کی بات کی جائے تو سلمان خان اس وقت ہدایت کار وامشی پیڈی پلی کی ایکشن تھرلر ’ایس وی سی 63‘ کی تیاریوں میں مصروف ہیں۔ اس فلم میں وہ پہلی بار جنوبی بھارتی فلموں کی معروف اداکارہ نین تارا کے ساتھ اسکرین شیئر کرتے نظر آئیں گے۔

پروڈیوسر دل راجو کی پروڈکشن میں بننے والی اس فلم کو بھارتی سنیما کے بڑے منصوبوں میں شمار کیا جا رہا ہے۔ توقع ہے کہ ’ایس وی سی 63‘ عید 2027 کے موقع پر سینما گھروں میں نمائش کے لیے پیش کی جائے گی۔

ہندوستھان سماچار

ہندوستان سماچار / Mohammad Khan