نئی دہلی، 03 اگست (ہ س)۔ ہندوستانی ریلوے نے جولائی 2026 میں مال برداری کے شعبے میں نمایاں کارکردگی کا مظاہرہ کرتے ہوئے 14.13 کروڑ ٹن مال کی نقل و حمل کی۔ یہ جولائی 2025 میں منتقل کیے گئے 12.97 کروڑ ٹن مال کے مقابلے میں 9 فیصد زیادہ ہے۔ اسی مدت کے دوران مال برداری سے حاصل ہونے والی آمدنی میں بھی 8 فیصد کا اضافہ درج کیا گیا ہے۔

ریلوے کی وزارت کی جانب سے پیر کو جاری کیے گئے اعداد و شمار کے مطابق، مال کی نقل و حمل میں یہ اضافہ ملک کے اہم صنعتی اور اقتصادی شعبوں سے مسلسل بڑھتی ہوئی طلب، آپریشنل کارکردگی میں بہتری اور مال برداری کے نظام کو زیادہ مؤثر بنانے کی کوششوں کا نتیجہ ہے۔

وزارت کے مطابق، مال کی اہم زمروں میں سب سے زیادہ اضافہ لوہے کی لوڈنگ میں 22.2 فیصد درج کیا گیا۔ اس کے علاوہ کھاد کی نقل و حمل میں 12 فیصد، غذائی اجناس اور کوئلے کی لوڈنگ میں 11.5-11.5 فیصد جبکہ دیگر اشیا کی نقل و حمل میں 12.1 فیصد کا اضافہ ہوا۔

وزارت ریلوے نے بتایا کہ تھرمل پاور پلانٹس میں بڑھتی ہوئی طلب کے پیش نظر ملکی کوئلے کی سپلائی کو ترجیح دی گئی۔ اس کے نتیجے میں گزشتہ سال کے مقابلے میں بجلی گھروں تک کوئلے کی سپلائی میں 20 فیصد کا اضافہ درج کیا گیا، جس سے توانائی کے شعبے کی ضروریات پوری کرنے میں ریلوے کا اہم کردار رہا۔

مال برداری میں اضافے کا مثبت اثر ریلوے کی آمدنی پر بھی نظر آیا۔ جولائی 2025 کے مقابلے میں جولائی 2026 میں مال برداری سے 1,137 کروڑ روپے کی اضافی آمدنی ہوئی، جس سے مجموعی مال برداری کی آمدنی میں 8 فیصد کا اضافہ درج کیا گیا۔

زونل ریلوے کی کارکردگی کی بات کریں تو مشرق وسطی ریلوے اور مشرقی ریلوے نے سب سے بہتر کارکردگی کا مظاہرہ کرتے ہوئے مال برداری کی آمدنی میں 33-33 فیصد کا اضافہ درج کیا۔ مغربی وسطی ریلوے میں 23 فیصد جبکہ جنوب مشرقی ریلوے میں 10.33 فیصد کا نمایاں آمدنی میں اضافہ درج کیا گیا۔

مسافر ٹرانسپورٹ کے شعبے میں بھی ہندوستانی ریلوے کی کارکردگی بہتر رہی۔ جولائی 2026 کے دوران ریلوے نے 63.35 کروڑ مسافروں کو ان کی منزل تک پہنچایا، جبکہ جولائی 2025 میں یہ تعداد 62.19 کروڑ تھی۔ مضافاتی اور غیر مضافاتی دونوں زمروں میں مسافروں کی تعداد میں اضافہ ہوا ہے، جو ریل سفر کی بڑھتی ہوئی مقبولیت اور بہتر خدمات کا اشارہ ہے۔

وزارت نے کہا کہ ہندوستانی ریلوے مال برداری کی صلاحیت بڑھانے، مسافروں کی سہولیات میں بہتری، جدید ریلوے بنیادی ڈھانچے کی توسیع اور کارکردگی کو مزید مضبوط بنانے کے لیے مسلسل کام کر رہا ہے۔ وزارت کے مطابق، ان کوششوں کا مقصد ملک کی اقتصادی ترقی، توانائی کے تحفظ اور سہل نقل و حمل کے نظام کو مزید مضبوط بنانا ہے۔

ہندوستھان سماچار

---------------

ہندوستان سماچار / عبدالواحد