سرینگر 3 اگست (ہ س): جنوبی کشمیر کے پلوامہ ضلع میں ایک مشترکہ سیکورٹی آپریشن کے دوران ایک شخص کو گرفتار کیا گیا، جس کے قبضے سے ایک ہینڈ گرنیڈ اور ملک مخالف پوسٹرز برآمد ہوئے۔ ایک سینئر پولیس افسر نے بتایا کہ پولیس کے اسپیشل آپریشن گروپ (ایس او جی)، سی آر پی ایف اور فوج کی طرف سے فروٹ منڈی کے قریب ایک مشترکہ ناکا لگایا گیا تھا۔ چیکنگ کے دوران مشترکہ ٹیم نے ایک شخص کو روک کر گرفتار کیا جس کی شناخت توصیف احمد ڈار ساکنہ پلوامہ ضلع کے دربگام پائین کے طور پر کی گئی۔ افسر نے بتایا کہ سیکورٹی فورسز نے اس کے قبضے سے ایک ہینڈ گرنیڈ، ایک آئی فون، تین ملک مخالف پوسٹرز اور ایک کلائی گھڑی برآمد کی۔ افسر نے بتایا کہ ایک کیس درج کر لیا گیا ہے اور برآمد شدہ اشیاء کے قبضے کے پیچھے محرکات کا پتہ لگانے اور کسی بھی ممکنہ روابط کی تحقیقات کے لیے مزید تفتیش شروع کر دی گئی ہے۔

ہندوستھان سماچار

ہندوستان سماچار / Aftab Ahmad Mir