ممبئی ، 3 اگست (ہ س) مہاراشٹر کے شہر تھانے کے کیسل مل علاقے میں واقع امبے گھوسالے جھیل سے پیر کی صبح ایک نامعلوم خاتون کی لاش برآمد ہونے کے بعد علاقے میں سنسنی پھیل گئی۔ رابوڑی پولیس اسٹیشن کی ٹیم نے لاش کو قبضے میں لے کر پوسٹ مارٹم کے لیے روانہ کر دیا ہے، جبکہ واقعے کی مختلف پہلوؤں سے تحقیقات جاری ہیں۔

تفتیشی افسر کے مطابق متوفیہ کی عمر تقریباً 55 سے 60 سال کے درمیان معلوم ہوتی ہے۔ خاتون کی شناخت کے لیے کوششیں جاری ہیں۔ پولیس نے اس معاملے میں حادثاتی موت کا مقدمہ درج کیا ہے۔ ابتدائی تحقیقات میں کسی مجرمانہ سازش یا مشتبہ سرگرمی کے شواہد سامنے نہیں آئے، تاہم پولیس کا کہنا ہے کہ پوسٹ مارٹم رپورٹ موصول ہونے کے بعد موت کی اصل وجہ واضح ہو سکے گی۔

تھانے میونسپل کارپوریشن کے ڈیزاسٹر مینجمنٹ سیل کے مطابق صبح تقریباً 9 بج کر 25 منٹ پر کنٹرول روم کو اطلاع ملی کہ پربھاکر ہیگڑے مارگ پر واقع کیسل مل سرکل اور آنجہانی میناتائی ٹھاکرے چوک کے قریب جھیل میں ایک خاتون کی لاش تیرتی ہوئی دیکھی گئی ہے۔اطلاع ملتے ہی ڈیزاسٹر مینجمنٹ سیل، تھانے فائر بریگیڈ، رابوڑی پولیس اور مقامی ایمرجنسی رسپانس ٹیم نے مشترکہ کارروائی کرتے ہوئے لاش کو جھیل سے باہر نکالا اور مزید کارروائی کے لیے پولیس کے حوالے کر دیا۔ پولیس خاتون کی شناخت اور موت کی وجوہات کا تعین کرنے کے لیے تحقیقات جاری رکھے ہوئے ہے۔

ہندوستھان سماچار

--------------------

ہندوستان سماچار / جاوید این اے