پونے، 3 اگست (ہ س): خاندانی جائیداد کے ترقیاتی معاہدے میں مالی دھوکہ دہی، اعتماد شکنی اور جان سے مارنے کی دھمکی دینے کا الزام عائد کرتے ہوئے ونود اننتا دھومال نے بلڈر کنال دلیپ چورڈیا کے خلاف فوری طور پر فوجداری مقدمہ درج کرنے کا مطالبہ کیا ہے۔ انہوں نے پمپری میں منعقدہ پریس کانفرنس میں اس معاملے کی تفصیلات پیش کیں۔ ونود دھومل نے بتایا کہ 22 دسمبر 2006 کو رجسٹرڈ ترقیاتی معاہدے اور جنرل پاور آف اٹارنی کے مطابق متعلقہ جائیداد کی ترقی کے بدلے انہیں چار سال کے اندر ایک کمرشیل عمارت میں ایک دکان اور 650 مربع فٹ سپر بلٹ اپ رقبے پر مشتمل ایک فلیٹ دینے کا وعدہ کیا گیا تھا۔ ان کے مطابق اسی یقین دہانی پر ان کے خاندان نے جائیداد ترقیاتی منصوبے کے لیے حوالے کر دی تھی۔

انہوں نے الزام لگایا کہ معاہدہ ہوئے تقریباً دو دہائیاں گزر جانے کے باوجود نہ تو ترقیاتی کام شروع کیا گیا اور نہ ہی معاہدے کی شرائط پوری کی گئیں۔ ان کا کہنا تھا کہ متعدد بار رجوع کرنے کے باوجود انہیں صرف یقین دہانیاں دی جاتی رہیں۔دھومال کا مزید الزام ہے کہ جب انہوں نے معاہدے کے مطابق معاوضہ یا جائیداد واپس کرنے کا مطالبہ کیا تو متعلقہ افراد نے انہیں دھمکیاں دیں، گالی گلوچ کی اور سنگین نتائج بھگتنے کی دھمکی بھی دی۔انہوں نے بتایا کہ اس سلسلے میں داپوڑی پولیس اسٹیشن میں تحریری شکایت درج کرائی جا چکی ہے، تاہم اب تک متعلقہ افراد کے خلاف کوئی مؤثر کارروائی نہیں کی گئی۔ انہوں نے مطالبہ کیا کہ معاملے کی غیر جانبدارانہ تحقیقات کرائی جائیں اور اگر الزامات درست ثابت ہوں تو ذمہ دار افراد کے خلاف فوری طور پر فوجداری مقدمہ درج کیا جائے۔

ہندوستھان سماچار

--------------------

ہندوستان سماچار / جاوید این اے