اندور، 3 اگست (ہ س)۔ مدھیہ پردیش کے اندور ضلع کے مہارانا پرتاپ نگر میں واقع ’پریماشریہ اولڈ ایج ہوم‘ میں بزرگوں کے ساتھ بے رحمی سے مارپیٹ کی ویڈیو وائرل ہونے کے بعد پیر کو ضلعی انتظامیہ اور میونسپل کارپوریشن نے مشترکہ کارروائی کی۔ بلڈوزر چلا کر غیر قانونی طور پر چلائے جا رہے پورے اولڈ ایج ہوم کو منہدم کر دیا گیا۔ تفتیش میں یہ بات بھی سامنے آئی کہ اولڈ ایج ہوم کا انتظام میونسپل کارپوریشن کی زمین اور آنگن واڑی مرکز کے لیے مختص عمارت پر قبضہ کرکے کیا جا رہا تھا۔

کارروائی کی بنیادی وجہ حال ہی میں سوشل میڈیا پر وائرل ہونے والی ایک شرمناک ویڈیو بنی، جس میں ایک نابالغ لڑکا اولڈ ایج ہوم میں رہنے والے بزرگوں کو ڈنڈے سے بے رحمی کے ساتھ پیٹتا ہوا نظر آ رہا تھا۔ معاملہ سامنے آتے ہی اندور کے کلکٹر شیوَم ورما نے فوری طور پر نوٹس لیتے ہوئے اولڈ ایج ہوم کو فوراً خالی کرانے اور وہاں رہنے والے تمام بے سہارا بزرگوں کو محفوظ مقامات اور دیگر پناہ گاہوں میں منتقل کرنے کی ہدایت دی تھی۔

تفتیش کے دوران انتظامی افسران نے پایا کہ ’پریماشریہ اولڈ ایج ہوم‘ کا انتظام میونسپل کارپوریشن کی پانی کی ٹنکی کے نیچے بنے احاطے میں غیر قانونی طور پر کیا جا رہا تھا۔ اس کے علاوہ قریب ہی آنگن واڑی مرکز کے لیے مختص عمارت پر بھی قبضہ کر لیا گیا تھا۔ کارروائی کے دوران اولڈ ایج ہوم کی منتظم نیلم دوبے نے صفائی پیش کرتے ہوئے کہا کہ سابق ایم آئی سی رکن سنتوش گور نے انہیں یہ زمین اولڈ ایج ہوم کے لیے دی تھی اور ان کے پاس اس کی رجسٹری بھی موجود ہے، تاہم انہوں نے آنگن واڑی کی زمین پر قبضے کی اطلاع سے انکار کیا۔ انتظامیہ نے واضح کیا کہ سرکاری زمین پر تجاوزات اور بزرگوں کے ساتھ بدسلوکی جیسے سنگین معاملات میں سخت کارروائی جاری رہے گی۔

ہندوستھان سماچار

---------------

ہندوستان سماچار / عبدالواحد