نئی دہلی، 28 اگست (ہ س)۔ آسٹریلیا کے ٹیسٹ اور ون ڈے کپتان پیٹ کمنز نے پاکستان کے سابق کپتان اور سابق وزیر اعظم عمران خان کے لئے باعزت علاج اور مناسب طبی دیکھ بھال کی درخواست کی حمایت کی ہے۔ یہ درخواست سابق آسٹریلیای کپتان گریگ چیپل سمیت کئی سابق بین الاقوامی کپتانوں نے پاکستان کے وزیر اعظم شہباز شریف کو مخاطب کرکے کی ہے ۔

درخواست میں عمران خان کو اہل خانہ سے ملاقات کی اجازت دینے کے ساتھ ساتھ آزادانہ طبی معائنہ اور عدالت کی ہدایت کے مطابقعلاج کو یقینی بنانے کی استدعا کی گئی ہے۔ اس درخواست پر سنیل گواسکر، کپل دیو اور دلیپ وینگسرکر سمیت 21 سابق بین الاقوامی کپتانوں نے دستخط کیے ہیں۔

کمنز نے جمعہ کو اپنے ایکس اکاونٹ پر لکھا”میں جی سی (گریگ چیپل) اور دیگر سابق بین الاقوامی کپتانوں کی حمایت میں کھڑا ہوں۔ مجھے امید ہے کہ عدالت کے حکم پر طبی معائنے کی اجازت دی جائے گی اور اہل خانہ سے ملنے کی اجازت دی جائے گی۔ مجھے امید ہے کہ عمران خان کے ساتھ وہ احترام کیا جائے گا جس کا ہر شخص مستحق ہے۔“

درخواست میں 73 سالہ عمران خان کی صحت کی حالت پر شدید تشویش کا اظہار کیا گیا ہے، خاص طور پر ان کی دائیں آنکھ میں بینائی کی نمایاں خرابی کی رپورٹس کا حوالہ دیا گیا ہے۔ خان تین سال سے زائد عرصے سے حراست میں ہیں۔

درخواست گزاروں نے تین اہم مطالبات کیے ہیں۔ ان میں سپریم کورٹ کے ہدایت کردہ میڈیکل بورڈ کے ذریعے صحت کا جامع معائنہ، بشمول عمران خان کے ذاتی معالج، خاندان کے بغیر کسی رکاوٹ کے ہفتہ وار دورے، اور ڈاکٹروں کے تجویز کردہ علاج پر فوری عمل درآمد شامل ہیں۔

درخواست میں، سابق کپتانوں نے خود کو ” کرکٹ کے میدان پر بنے رشتے ، اپنے سابق دوست اور حریف“ کے طور پر بیان کرتے ہوئے کہا کہ یہ رشتہ سرحدوں اور تنازعات سے بالاتر ہے جو اکثر ممالک کو تقسیم کرتے ہیں۔

عمران خان نے 1992 میں پاکستان کو پہلی بار ون ڈے ورلڈ کپ میں فتح دلائی تھی۔ انہوں نے 2018 سے 2022 تک پاکستان کے وزیر اعظم کے طور پر بھی خدمات انجام دیں۔ اگست 2023 میں، انہیں کئی الزامات کے تحت جیل بھیج دیا گیا۔ ان کی پارٹی اور اتحادیوں نے ان مقدمات کو سیاست پر مبنی قرار قرار دیا ہے۔

یہ مشترکہ اپیل اس تنازعہ کے بعد کی گئی ہے کہ جس میں عمران خان کا معائنہ ذاتی معالجوں کے بجائے سرکاری اسپتال میں ریاست کے ذریعہ تشکیل دی گئی سرکاری ڈاکٹروں کی ایک ٹیم نے کیا تھا۔ درخواست گزاروں کا کہنا ہے کہ پاکستان کی عدالت عظمی نے ان کے ذاتی معالجوں سے جانچ کرانے کا حکم دیا تھا۔

اس سے قبل ’دی گریڈ کرکٹر‘ پوڈ کاسٹ پر گریگ چیپل نے بھی عمران خان کی بگڑتی ہوئی صحت پر تشویش کا اظہار کیا تھا۔ چیپل نے کہا کہ وہ تقریباً چھ سال قبل پاکستان میں عمران خان سے ملے تھے اور اس وقت وہ مضبوط اور صحت مند تھے لیکن اب ان کی حالت ایسی نہیں ہے۔

چیپل نے عمران کی دائیں آنکھ کے مسئلے، ان کی طویل تنہائی اور ان کی ذہنی صحت کے بارے میں بھی تشویش کا اظہار کیا۔ انہوں نے کہا کہ تین سال مکمل تنہائی ان کی ذہنی اور جسمانی صحت پر سنگین نتائج کا باعث بن سکتی ہے۔

ہندوستھان سماچار

---------------

ہندوستان سماچار / محمد شہزاد