پونے، 26 اگست (ہ س): ڈائریکٹوریٹ آف ریونیو انٹیلی جنس ڈی آر آئی کی ٹیم نے پونے ریلوے جنکشن پر تقریباً 3 کروڑ 41 لاکھ روپے مالیت کی منشیات کے ساتھ ایک بھارتی خاتون مسافر کو گرفتار کیا ہے۔ ڈی آر آئی کی جانب سے معاملے کی گہرائی سے تفتیش کی جا رہی ہے۔ ڈی آر آئی کے ایک افسر نے بدھ کو بتایا کہ خفیہ اطلاع ملی تھی کہ ایک خاتون دہلی کے نظام الدین ریلوے اسٹیشن سے آنے والی ٹرین کے ذریعے منشیات کی کھیپ لے کر پونے پہنچ رہی ہے۔ اس اطلاع کی بنیاد پر ڈی آر آئی کی ٹیم نے پونے ریلوے اسٹیشن پر نگرانی شروع کردی۔

منگل کو دہلی سے آنے والی ٹرین کے پونے اسٹیشن پہنچتے ہی ڈی آر آئی کی ٹیم نے متعلقہ خاتون کے سامان کی تلاشی لی۔ تلاشی کے دوران اس کے سامان سے 2532 گرام سفید اور پیلے رنگ کا قلمی مادہ برآمد ہوا، جس کے ایمفیٹامین ہونے کا شبہ ہے۔ اس کے علاوہ مختلف رنگوں کی 878 گرام گولیاں بھی برآمد ہوئیں، جن کے ایم ڈی ایم اے ہونے کا شبہ ظاہر کیا گیا ہے۔ ڈی آر آئی نے تمام مشتبہ منشیات ضبط کرلی۔

ضبط شدہ منشیات کی مجموعی مالیت تقریباً 3 کروڑ 41 لاکھ روپے بتائی گئی ہے۔ برآمدگی کے بعد خاتون کو گرفتار کرلیا گیا۔ ایجنسی منشیات کے ماخذ اور ممکنہ منزل کا پتہ لگانے کے ساتھ ساتھ مبینہ اسمگلنگ نیٹ ورک سے وابستہ دیگر افراد کی شناخت کے لیے بھی تفتیش کر رہی ہے۔

ہندوستھان سماچار

--------------------

ہندوستان سماچار / جاوید این اے