ڈی پی ایل : ساوتھ دہلی سپر اسٹارز نے نئی دہلی ٹائیگرز کو پانچ وکٹوں سے ہرایا

نئی دہلی، 25 اگست (ہ س)۔ ساوتھ دہلی سپر اسٹارز نے دہلی پریمیئر لیگ 2026 میں شاندار کارکردگی کا مظاہرہ کرتے ہوئے پیر کی رات نئی دہلی ٹائیگرز کو پانچ وکٹوں سے شکست دے دی۔ ساوتھ دہلی سپر اسٹارز نے 169 رن کا ہدف 18ویں اوور میں ہی حاصل کر لیا۔ پہلے بلے بازی کرتے ہوئے نئی دہلی ٹائیگرز نے 20 اوورز میں نو وکٹوں کے نقصان پر 168 رن بنائے۔ لکشیہ تھریجا نے 47 گیندوں پر 62 رن کی عمدہ اننگز کھیل کر ٹیم کی پوزیشن کو سنبھالا۔ آخری اوورز میں نمن تیواری نے دو گیندوں پر 10 رن اور ریوان رکیان نے چھ گیندوں پر 17 رن بنا کر ٹیم کو ایک مضبوط اسکور تک پہنچایا۔

ساوتھ دہلی سپر اسٹارز کی جانب سے انکت ڈباس نے چار اوورز میں 16 رن دے کر دو وکٹیں حاصل کیں۔ وہیں دیوانش راوت نے دو اوورز میں 25 رن دینے کے باوجود چار وکٹیں لے کر موثر کارکردگی کا مظاہرہ کیا۔ ہدف کے تعاقب میں اترنے والی ساوتھ دہلی سپر اسٹارز نے اچھا آغاز کیا۔ انمول شرما نے اپنی شاندار فارم برقرار رکھتے ہوئے ایک اور نصف سنچری جڑی اور ٹیم کو مضبوط بنیاد فراہم کی۔ وہ 16ویں اوور میں آوٹ ہوئے، لیکن دوسرے سرے پر ایکانش ڈوبال نے اننگز کو سنبھالے رکھا۔

اس کے بعد انکت نے 18ویں اوور میں پارتھ کی گیندوں پر مسلسل تین چھکے لگا کر میچ کا رخ پوری طرح ساوتھ دہلی سپر اسٹارز کے حق میں موڑ دیا۔ وہ پانچ گیندوں پر 18 رن بنا کر آوٹ ہوئے۔ ایکانش 18 گیندوں پر 38 رن بنا کر ناٹ آوٹ رہے۔ ساوتھ دہلی سپر اسٹارز نے 18ویں اوور میں ہی ہدف حاصل کر کے پانچ وکٹوں سے شاندار جیت درج کی۔

ہندوستھان سماچار

--------------

ہندوستان سماچار / انظر حسن