کولمبو، 24 اگست (ہ س)۔

ہندوستانی وکٹ کیپر بلے باز رشبھ پنت نے سری لنکا کے خلاف دوسرے ٹیسٹ کے دوران ایک اور بڑی کامیابی حاصل کی۔ پنت نے آسٹریلیا کے عظیم وکٹ کیپر ایڈم گلکرسٹ کو پیچھے چھوڑتے ہوئے ٹیسٹ کرکٹ میں سب سے زیادہ چھکے لگانے والے بلے بازوں کی فہرست میں تیسرا مقام حاصل کر لیا۔

پنت نے 89 گیندوں پر 63 رنز کی اننگز کھیلی، جس میں چھ چوکے اور دو چھکے شامل تھے۔ اس کے ساتھ ہی ٹیسٹ کرکٹ میں ان کے چھکوں کی تعداد 102 ہو گئی ہے۔ انہوں نے یہ کارنامہ 52 ٹیسٹ میچوں میں انجام دیا ہے۔ گلکرسٹ نے 96 ٹیسٹ میچوں میں 100 چھکے لگائے تھے۔

ٹیسٹ کرکٹ میں سب سے زیادہ چھکے لگانے والے بلے بازوں کی فہرست میں انگلینڈ کے سابق کپتان بین اسٹوکس 138 چھکوں کے ساتھ سرفہرست ہیں، جبکہ نیوزی لینڈ کے سابق کپتان برینڈن میک کولم 107 چھکوں کے ساتھ دوسرے نمبر پر ہیں۔

ورلڈ ٹیسٹ چیمپئن شپ میں بھی تاریخ رقم

پنت نے ورلڈ ٹیسٹ چیمپئن شپ میں بھی ہندوستانی بلے بازوں کے درمیان نیا ریکارڈ قائم کیا۔ انہوں نے ہندوستانی کپتان شبھمن گل کو پیچھے چھوڑ کر ورلڈ ٹیسٹ چیمپئن شپ میں ہندوستان کی جانب سے سب سے زیادہ رنز بنانے والے بلے باز کا ریکارڈ اپنے نام کر لیا۔

پنت نے ورلڈ ٹیسٹ چیمپئن شپ میں 42 ٹیسٹ کی 74 اننگز میں 2,948 رنز بنائے ہیں۔ ان کی اوسط 42.11 اور اسٹرائیک ریٹ 74 سے زیادہ ہے۔ ان کے نام چھ سنچریاں اور 18 نصف سنچریاں ہیں، جبکہ ان کا سب سے بڑا اسکور 146 رنز ہے۔ شبھمن گل کے نام 42 ٹیسٹ میچوں میں 2,917 رنز ہیں۔

غیر ملکی میدانوں پر دھونی کو بھی پیچھے چھوڑ دیا

پنت نے غیر ملکی اور غیر جانب دار میدانوں پر ہندوستانی وکٹ کیپرز کی جانب سے سب سے زیادہ ٹیسٹ رنز بنانے کے معاملے میں سابق کپتان مہندر سنگھ دھونی کو بھی پیچھے چھوڑ دیا۔ دھونی نے 48 ٹیسٹ میچوں میں 2,496 رنز بنائے تھے، جبکہ پنت اب 36 ٹیسٹ کی 64 اننگز میں 2,534 رنز بنا چکے ہیں۔

اس دوران پنت کے نام چھ سنچریاں اور 11 نصف سنچریاں ہیں اور ان کی اوسط 41.54 ہے۔ اس سال پنت نے تین ٹیسٹ کی چار اننگز میں 249 رنز بنائے ہیں۔ ان کی اوسط 62.25 اور اسٹرائیک ریٹ 73.02 رہا ہے۔ اس دوران انہوں نے تین نصف سنچریاں بنائی ہیں اور ان کا سب سے بڑا اسکور 81 رنز ہے۔

سری لنکا کے خلاف دوسرے ٹیسٹ میں ہندوستان نے اپنی پہلی اننگز 9 وکٹ پر 503 رنز بنا کر ڈکلیئر کردی۔ دن کا کھیل ختم ہونے تک سری لنکا نے صرف 8 رنز پر 2 وکٹیں گنوا دی ہیں۔

ہندوستھان سماچار

ہندوستان سماچار / عطاءاللہ