بنگلورو، 24 اگست (ہ س)۔ کرناٹک مہارشی والمیکی درج فہرست قبائل ترقیاتی کارپوریشن میں مبینہ کروڑوں روپے کے گھوٹالے کے خلاف بھارتیہ جنتا پارٹی نے پیر کو بنگلورو میں احتجاج کیا۔ بی جے پی رہنماؤں اور کارکنوں نے وزیر بی ناگیندر کے استعفے اور مبینہ مالی بے ضابطگیوں کی غیر جانب دارانہ تحقیقات کا مطالبہ کیا۔

صبح تقریباً 10 بجے بی جے پی کے رہنما اور کارکن فریڈم پارک میں جمع ہوئے اور ریاست کی کانگریس حکومت کے خلاف شدید نعرے بازی کی۔ اسمبلی میں اپوزیشن لیڈر آر اشوک اور بی جے پی کے ریاستی صدر بی وائی وجیندر کی قیادت میں مظاہرین نے ودھان سودھ کی جانب مارچ کرنے کی کوشش کی۔

احتجاج کے پیش نظر ودھان سودھا اور وکاس سودھا کے اطراف سکیورٹی کے سخت انتظامات کیے گئے تھے۔ پولیس نے بیریکیڈ لگا کر داخلے کے راستے بند کردیئے تھے۔ سکیورٹی کے لیے پولیس کے ساتھ کرناٹک اسٹیٹ ریزرو پولیس (کے ایس آر پی) کی ٹیمیں بھی تعینات کی گئی تھیں۔ مظاہرین کو حراست میں لینے کے لیے بی ایم ٹی سی کی بسوں کا بھی انتظام کیا گیا تھا۔

ودھان سودھا کی جانب بڑھنے والے بی جے پی رہنماؤں اور کارکنوں کو پولیس نے راستے میں ہی روک دیا۔ اس دوران مظاہرین نے کانگریس حکومت اور وزیر بی ناگیندر کے خلاف نعرے لگائے۔ بعد ازاں آر اشوک، بی وائی وجیندر، سی ٹی روی اور این روی کمار سمیت بی جے پی کے کئی اہم رہنماؤں کو پولیس نے حراست میں لے لیا۔

ریاستی قانون ساز کونسل میں اپوزیشن لیڈر چلوادی نارائن سوامی نے الزام عائد کیا کہ والمیکی برادری کے لیے مختص 187 کروڑ روپے کی رقم کا مبینہ طور پر غلط استعمال کیا گیا۔ انہوں نے کہا کہ اگر وزیر بی ناگیندر کو کابینہ سے برطرف نہیں کیا گیا تو بی جے پی اپنا احتجاج مزید تیز کرے گی۔سابق نائب وزیر اعلیٰ ڈاکٹر سی این اشوتھ نارائن اور سابق وزیر راجو گوڑا سمیت دیگر بی جے پی رہنماؤں نے بھی وزیر کے استعفے کا مطالبہ کیا۔ ان کا کہنا تھا کہ غریب اور محروم طبقات کی فلاح کے لیے مختص رقم کے مبینہ غلط استعمال کو کسی بھی صورت برداشت نہیں کیا جاسکتا۔

بی جے پی کے ریاستی صدر بی وائی وجیندر نے کہا کہ ریاستی حکومت کے خزانے کے ساتھ ساتھ غریبوں، محروم طبقات اور دلتوں کے لیے مختص رقم کے مبینہ غلط استعمال کے الزامات کی جامع تحقیقات ہونی چاہیے۔ انہوں نے وزیر کو کابینہ سے برطرف کرنے اور معاملے کی مکمل حقیقت عوام کے سامنے لانے کا مطالبہ کیا۔

وجیندر نے کہا کہ بی جے پی اپنے مطالبات کو لے کر اسمبلی کے اندر اور باہر جدوجہد جاری رکھے گی۔ انہوں نے واضح کیا کہ وزیر کے خلاف کارروائی اور مبینہ گھوٹالے کی مکمل تحقیقات ہونے تک پارٹی کا احتجاج جاری رہے گا۔

ہندوستھان سماچار

ہندوستان سماچار / Mohammad Khan