نئی دہلی، 20 اگست (ہ س)۔ عام آدمی پارٹی (آپ) کے قومی کنوینر اور دہلی کے سابق وزیر اعلی اروند کیجریوال نے چینی کی بڑھتی ہوئی قیمتوں اور گنے سے ایتھنول کی پیداوار کو لے کر مرکزی حکومت کو نشانہ بنایا۔ کیجریوال نے الزام عائد کیا کہ غیر ملکی زرمبادلہ بچانے کے لیے ایتھنول کی پیداوار کے لیے گنے کا استعمال بڑھایا گیا، لیکن اس کے نتیجے میں ملک میں چینی کی قلت پیدا ہوگئی۔

اروند کیجریوال نے جمعرات کو سوشل میڈیا پلیٹ فارم ایکس پر پوسٹ کرتے ہوئے مرکزی حکومت کی پالیسیوں پر سوال اٹھایا۔ انہوں نے حکومت پر تنقید کرتے ہوئے کہا کہ انہیں پتہ نہیں ہے کہ کسی فیصلے کا آگے کیا اثر ہوگا۔

کیجریوال نے وضاحت کی کہ تیل کی درآمدات پر خرچ ہونے والی غیر ملکی کرنسی کو بچانے کے لیے گنے سے ایتھنول بنانا شروع کیا گیا تھا۔ نتیجہ یہ ہوا کہ چینی کی کمی ہو گئی۔ اب اسی غیر ملکی کرنسی سے چینی کی درآمدات کی نوبت آگئی ہے۔ انہوں نے اسے حکومت کی پالیسی پر ایک بڑا سوال قرار دیتے ہوئے کہا کہ آخر یہ حکومت ہے یا مذاق؟ چینی کی قیمتوں کے بارے میں، کیجریوال نے دعوی کیا کہ پچھلے 17 دنوں میں قیمتوں میں تیزی سے 20 روپے تک کا اضافہ درج کیا گیا ہے۔ واضح ہو کہ دہلی میں چینی 67روپے فی کلوگرام تک کی قیمت میں فروخت ہو رہی ہے۔

ہندوستھان سماچار

ہندوستان سماچار / محمد شہزاد