جموں, 20 اگست (ہ س): جموں ہیرا نگر کے بعض علاقوں میں دھان کی فصل کی بالیاں نکلنے سے قبل ہی پتے سفید ہونے لگے ہیں، جس سے کسانوں میں فصل کو نقصان پہنچنے کا خدشہ پیدا ہوگیا ہے۔ کسانوں کے مطابق کئی کھیتوں میں دھان کے پودوں کی پتیوں کا رنگ تبدیل ہوکر اوپر سے سفید دکھائی دے رہا ہے اور آہستہ آہستہ اس کا اثر دیگر پودوں پر بھی نظر آرہا ہے۔

کسانوں نے محکمہ زراعت سے مطالبہ کیا ہے کہ متاثرہ علاقوں کا معائنہ کرکے پتیوں کے سفید پڑنے کی اصل وجہ معلوم کی جائے اور فصل کو بچانے کے لیے مناسب علاج کے بارے میں رہنمائی فراہم کی جائے۔

محکمہ زراعت ہیرا نگر زون کے افسر ونود شرما نے کہا کہ پتیوں کے سفید پڑنے کی ممکنہ وجوہات میں پتی لپیٹک کیڑا، ہسپا یا دیگر کیڑوں کا حملہ شامل ہوسکتا ہے، تاہم صرف پتیوں کا رنگ دیکھ کر حتمی تشخیص ممکن نہیں۔

انہوں نے کسانوں کو مشورہ دیا کہ بغیر تشخیص کے کسی بھی کیڑے مار دوا کا چھڑکاؤ نہ کریں۔ اگر پتیوں پر کیڑے، سرنگ، کھرچاؤ یا اندر سنڈیاں نظر آئیں تو متاثرہ پودوں کی جانچ کے بعد ہی علاج کیا جائے۔

محکمہ زراعت نے کسانوں سے کہا ہے کہ متاثرہ کھیت سے پودے کا نمونہ لے کر قریبی زرعی دفتر یا ماہرین سے مشورہ کریں اور صرف تجویز کردہ دوا مقررہ مقدار میں استعمال کریں۔ متعلقہ عملے کو علاقے میں فصلوں کا معائنہ کرنے اور کسانوں کو ضروری رہنمائی فراہم کرنے کی ہدایت بھی دی گئی ہے۔

ہندوستھان سماچار

---------------

ہندوستان سماچار / محمد اصغر