نئی دہلی، 19 اگست (ہ س)۔

اتر پردیش کے وزیر اعلیٰ یوگی آدتیہ ناتھ نے یوپی-جاپان انویسٹمنٹ میٹ کے دوران بڑی کمپنیوں کے چیف ایگزیکٹو افسران (سی ای اوز) اور بزنس لیڈرز کے ساتھ منعقدہ راو¿نڈ ٹیبل میٹنگ میں سرمایہ کاروں کی جانب سے ریاست میں سرمایہ کاری کے لیے جوش و خروش دکھانے پر ان کا شکریہ ادا کیا۔ انہوں نے کہا کہ گزشتہ نو برسوں میں اتر پردیش میں 360 ڈگری کی جامع تبدیلی آئی ہے۔ اسی تبدیلی کی وجہ سے آج اتر پردیش ہندوستان کی اہم اور پسندیدہ سرمایہ کاری کی منزل کے طور پر ابھر کر سامنے آیا ہے۔

وزیر اعلیٰ نے کہا کہ اتر پردیش میں سرمایہ کاری کرنے والے صنعت کاروں اور کمپنیوں کو حکومت کی جانب سے ہر ممکن تعاون فراہم کیا جائے گا۔ انہوں نے سرمایہ کاروں سے اپیل کرتے ہوئے کہا کہ وہ اتر پردیش آئیں اور یہاں اپنی صنعتی اور کاروباری سرگرمیوں کو وسعت دیں۔ حکومت اس بات کو یقینی بنائے گی کہ سرمایہ کاروں کو کسی بھی سطح پر غیر ضروری پریشانی کا سامنا نہ کرنا پڑے۔

سرمایہ کاروں کی تجاویز پر سنجیدگی سے غور ہوگا

یوگی نے کہا کہ انویسٹمنٹ میٹ کے حوالے سے بڑے صنعت کاروں اور سی ای اوز نے جس طرح کا جوش و خروش دکھایا ہے، اس کے لیے وہ سب کا دل کی گہرائیوں سے شکریہ ادا کرتے ہیں۔ سرمایہ کاروں کی جانب سے دی گئی تجاویز کا ریاستی حکومت کی ٹیم نے سنجیدگی سے نوٹس لیا ہے۔ انہوں نے یقین دلایا کہ سرمایہ کاروں کی تجاویز اور توقعات پر سنجیدگی سے غور کیا جائے گا اور جو بھی عملی مسائل سامنے آئیں گے، ان کے حل کے لیے ضروری اقدامات کیے جائیں گے۔ حکومت اور اس کی پوری ٹیم سرمایہ کاری کے لیے سازگار ماحول فراہم کرنے کے لیے پرعزم ہے۔

نوجوان افرادی قوت اور اسکلنگ بنے گی طاقت

وزیر اعلیٰ نے کہا کہ اتر پردیش کے پاس بڑی تعداد میں نوجوان افرادی قوت موجود ہے۔ حکومت نوجوانوں کو صنعتوں کی ضروریات کے مطابق اسکلنگ اور اپ اسکلنگ کے مواقع فراہم کر رہی ہے۔ اس سے سرمایہ کاروں کو تربیت یافتہ اور قابل انسانی وسائل دستیاب ہوں گے۔ ریاست میں بدلتے صنعتی منظرنامے کے مطابق انفراسٹرکچر، کنیکٹیویٹی، ہنرمند افرادی قوت اور کاروبار کرنے میں آسانی کو مسلسل مضبوط کیا جا رہا ہے۔ اس کا براہ راست فائدہ ریاست میں سرمایہ کاری کرنے والی کمپنیوں کو ملے گا۔

سرمایہ کاروں کو ہر سطح پر تعاون

انہوں نے کہا کہ اتر پردیش میں ہونے والی سرمایہ کاری سرمایہ کاروں کے لیے کافی فائدہ مند ثابت ہوگی۔ ریاستی حکومت اپنی پالیسیوں کے دائرے میں سرمایہ کاروں کو ہر ممکن تعاون فراہم کرے گی۔ حکومت کی کوشش ہے کہ سرمایہ کاری کا عمل آسان، شفاف اور مقررہ مدت کے اندر مکمل ہو اور صنعت کاروں کو اپنے کاروبار کی توسیع پر توجہ دینے کے لیے بہتر ماحول ملے۔ حکومت کی پوری ٹیم سرمایہ کاروں کے ساتھ کھڑی ہے اور کسی بھی قسم کی پریشانی کی صورت میں اس کے حل کے لیے مو¿ثر نظام یقینی بنایا جائے گا۔

’جو کہتے ہیں، اسے زمین پر اتارتے ہیں‘

وزیر اعلیٰ یوگی آدتیہ ناتھ نے کہا کہ اتر پردیش حکومت صرف اعلانات کرنے پر یقین نہیں رکھتی بلکہ جو کہتی ہے، اسے عملی جامہ پہناتی ہے۔ گزشتہ نو برسوں میں ریاست میں آنے والی تبدیلی کو سرمایہ کار خود دیکھ سکتے ہیں۔ امن و قانون، کنیکٹیویٹی، انفراسٹرکچر، صنعتی ماحول اور سرمایہ کاری کے لیے تیار پالیسیوں سے آنے والی تبدیلی نے اتر پردیش کی نئی تصویر پیش کی ہے۔ حکومت کے کام کرنے کے طریقہ کار میں آنے والی یہ تبدیلی سرمایہ کاروں کو بھی نظر آئے گی۔

انویسٹمنٹ میٹ کو اہم موقع قرار دیا

وزیر اعلیٰ نے اس انویسٹمنٹ میٹ کو اتر پردیش کی صنعتی ترقی اور سرمایہ کاری کے لحاظ سے انتہائی اہم قرار دیا۔ انہوں نے کہا کہ اس طرح کی بات چیت کے ذریعے حکومت کو صنعت کی توقعات اور ضروریات کو سمجھنے کا موقع ملتا ہے، جبکہ سرمایہ کاروں کو ریاست میں دستیاب امکانات اور سہولیات کے بارے میں معلومات ملتی ہیں۔

یوگی نے اعتماد ظاہر کیا کہ بڑے صنعتی گروپوں کی اتر پردیش میں بڑھتی ہوئی دلچسپی سے ریاست میں نئی سرمایہ کاری، روزگار اور اقتصادی سرگرمیوں کو مزید رفتار ملے گی۔ انہوں نے سرمایہ کاروں سے اتر پردیش کی ترقی کے سفر میں شراکت دار بننے اور ریاست میں سرمایہ کاری کے مواقع سے فائدہ اٹھانے کی اپیل بھی کی۔

ہندوستھان سماچار

ہندوستان سماچار / عطاءاللہ