کولکاتا، 19 اگست (ہ س)۔مغربی بنگال پولیس کی اسپیشل ٹاسک فورس (ایس ٹی ایف) نے پاکستان کی خفیہ ایجنسی آئی ایس آئی سے تعلق رکھنے والے پاکستانی شہری وہاب عالم کے تیسرے مقامی ساتھی کو گرفتار کیا ہے۔ گرفتار ملزم کی شناخت ظفر شمس عرف سنی کے طور پر ہوئی ہے۔ عالم کو اس ماہ کے شروع میں شمالی 24 پرگنہ ضلع کے ہاوڑہ سے گرفتار کیا گیا تھا۔

پولیس کے مطابق مشرقی کولکاتا کے توپسیا کا رہائشی سنی وہاب عالم کی گرفتاری کے بعد سے مفرور تھا۔ ایس ٹی ایف نے اسے ہگلی ضلع کے رشڑا سے گرفتار کیا۔ تاہم پولیس نے اس کی گرفتاری کے وقت اور آپریشن کی دیگر تفصیلات کا انکشاف نہیں کیا ہے۔

ایس ٹی ایف حکام سنی سے پوچھ گچھ کر رہے ہیں تاکہ یہ معلوم کیا جا سکے کہ وہ وہاب عالم کی مبینہ سرگرمیوں میں کیسے ملوث تھا۔ ایک پولیس اہلکار نے بتایا کہ تفتیش کاروں کو شبہ ہے کہ سنی نے ہندوستان سے پاکستان کی خفیہ ایجنسی آئی ایس آئی کو خفیہ معلومات منتقل کرنے کے لیے وہاب عالم کی طرف سے بنائے جانے والے خفیہ نیٹ ورک کو مضبوط کرنے میں کردار ادا کیا ہوگا۔

دو دن پہلے ایس ٹی ایف نے وہاب عالم کے دوسرے ساتھی عمران حسین کو توپسیا میں اس کے گھر سے گرفتار کیا تھا۔ اس سے قبل وہاب عالم کے قریبی ساتھی محمد اعجاز کو بھی اسی علاقے سے گرفتار کیا گیا تھا۔

تحقیقات سے پتہ چلا ہے کہ وہاب عالم مبینہ طور پر 2012 میں نیپال کے راستے غیر قانونی طور پر مغربی بنگال میں داخل ہوا تھا۔ اس کے بعد وہ اعجاز کے گھر رہتا تھا۔ الزام ہے کہ اعجاز نے پاکستانی شہری کے لیے ہندوستانی شناختی دستاویزات تیار کرنے میں اس کی مدد کی تھی۔

ایس ٹی ایف کو سنی کے بارے میں وہاب عالم، اعجاز اور عمران سے الگ الگ اور بعد میں ایک ساتھ پوچھ گچھ کے دوران معلوم ہوا۔ اس معاملے میں ایس ٹی ایف نے 14 اگست کی رات کو ہندوستان-بنگلہ دیش سرحد کے ساتھ کوچ بہار ضلع کے صاحب گنج علاقے سے تین دیگر مشتبہ پاکستانی جاسوسوں کو بھی گرفتار کیا تھا۔ ان کی شناخت رشید الحق، نور ناصر الدین علی اور شفیق الاسلام کے طور پر ہوئی ہے۔ بتایا جاتا ہے کہ تینوں ہندوستانی شہری ہیں۔

اس دوران نیشنل انویسٹی گیشن ایجنسی (این آئی اے) نے بھی وہاب عالم کے بارے میں معلومات اکٹھا کرنا شروع کر دی ہیں۔ ایس ٹی ایف کی ابتدائی تحقیقات میں وہاب عالم کے آئی ایس آئی سے مبینہ روابط کا انکشاف ہونے کے بعد، این آئی اے نے مغربی بنگال ایس ٹی ایف سے تحقیقات کرنے اور اب تک کی معلومات اکٹھا کرنے کو کہا ہے۔

این آئی اے وہاب عالم اور اعجاز سے پوچھ گچھ کرے گی۔ ضرورت پڑنے پر کوچ بہار سے گرفتار کیے گئے عمران حسین اور تین دیگر ملزموں سے بھی پوچھ گچھ کی جا سکتی ہے۔

ہندوستھان سماچار

---------------

ہندوستان سماچار / عبدالسلام صدیقی