نئی دہلی، 19 اگست (ہ س): قومی انسانی حقوق کمیشن (این ایچ آر سی) نے دہلی کے منیرکا علاقے میں منی پور کے دو افراد کے ساتھ مبینہ مارپیٹ کے معاملے کا ازخود نوٹس لیا ہے۔ اس حملے میں ایک شخص کے سر پر شدید چوٹ آئی ہے اور اسے اسپتال میں وینٹی لیٹر پر رکھا گیا ہے۔

این ایچ آر سی نے کہا کہ 14 اگست کو شائع میڈیا رپورٹ میں بتایا گیا تھا کہ معمولی تنازع کے بعد دو افراد پر دو اشخاص نے مبینہ طور پر حملہ کردیا۔ یہ واقعہ دہلی کے منیرکا علاقے کا بتایا گیا ہے۔ کمیشن نے اسے سنگین معاملہ قرار دیتے ہوئے کارروائی کی ہے۔

کمیشن نے کہا کہ یہ تمام معلومات میڈیا رپورٹ میں دی گئی ہیں۔ اگر میڈیا رپورٹ میں سامنے آنے والی باتیں درست ہیں تو یہ انسانی حقوق کی سنگین خلاف ورزی کا معاملہ ہے۔ اس پر این ایچ آر سی نے دہلی پولیس کمشنر کو نوٹس جاری کرکے دو ہفتوں کے اندر معاملے کی تفصیلی رپورٹ طلب کی ہے۔

کمیشن نے پولیس سے معاملے میں کی گئی تحقیقات اور زخمی شخص کی موجودہ صحت کی صورتحال کے بارے میں بھی معلومات دینے کو کہا ہے۔ کمیشن نے کہا کہ معاملے کی سنگینی کو دیکھتے ہوئے دہلی پولیس سے تفصیلی رپورٹ طلب کی گئی ہے۔

ہندوستھان سماچار

---------------

ہندوستان سماچار / عبدالواحد