حوثی باغیوں نے سعودی عرب کی جیزان ریفائنری کو ڈرون سے بنایا نشانہ

صنعاء/ریاض، 19 اگست (ہ س)۔ یمن کے ایران نواز حوثی باغیوں نے سعودی عرب کے جنوبی بحیرۂ احمر کے ساحل پر واقع جیزان میں سعودی آرامکو کی تیل ریفائنری کو ڈرون سے نشانہ بنانے کا دعویٰ کیا ہے۔ حوثی میڈیا کے مطابق یہ حملہ یمن کے صعدہ اور حجہ صوبوں میں فضائی حدود کی مبینہ خلاف ورزی کے جواب میں کیا گیا۔ حوثی خبر رساں ایجنسی ’سبا‘ نے ایک فوجی ذرائع کے حوالے سے بتایا کہ گروپ نے ’’کئی ڈرونز‘‘ کے ذریعے جیزان میں واقع آرامکو ریفائنری کو نشانہ بنایا۔ تاہم، حملے سے ہونے والے نقصان یا کسی کے جانی نقصان کی فی الحال کوئی اطلاع نہیں ہے۔

یہ حملہ ایسے وقت میں ہوا ہے جب حوثیوں نے سعودی عرب کے خلاف اپنے حملے تیز کرنے کے ساتھ ساتھ بحری ناکہ بندی کا بھی اعلان کیا ہے۔ سعودی عرب طویل عرصے سے یمن کی بین الاقوامی سطح پر تسلیم شدہ حکومت کی حمایت کرتا رہا ہے اور ماضی میں حوثی ٹھکانوں کے خلاف فوجی مہم بھی چلا چکا ہے۔

حوثیوں نے حالیہ دنوں میں سعودی تیل بردار جہازوں (آئل ٹینکرز) اور یمنی سرکاری افواج کو بھی نشانہ بنایا ہے۔ یہ گروپ اس سے قبل بھی سعودی عرب کی تیل کی تنصیبات اور ہوائی اڈوں پر متعدد حملے کر چکا ہے۔ اقوامِ متحدہ کے سکریٹری جنرل انٹونیو گوٹیریس کے ترجمان نے ان حملوں کی خبروں پر ’’گہری تشویش‘‘ کا اظہار کیا۔ انہوں نے کہا کہ اس نوعیت کے حملوں سے یمن وسیع تر علاقائی تنازعہ میں مزید الجھ سکتا ہے۔

اقوامِ متحدہ نے خبردار کیا کہ خطے میں پہلے سے جاری کشیدگی کے دوران ایسے حملوں سے علاقائی تجارت اور توانائی کی فراہمی متاثر ہونے کا خطرہ بڑھ سکتا ہے۔ قابلِ ذکر ہے کہ حوثی باغیوں نے گزشتہ ماہ ایران کے ایک طیارے کے یمن کے دارالحکومت صنعاء میں اترنے کا بھی خیر مقدم کیا تھا۔ اس کے بعد سے خطے میں ایک دوسرے کے خلاف حملوں کا سلسلہ تیز ہو گیا ہے۔

ہندوستھان سماچار

---------------

ہندوستان سماچار / انظر حسن