عدالت نے بی سی سی آئی صدر متھن منہاس کے خلاف تحقیقات کا حکم جاری کیا

جموں، 19 اگست (ہ س)۔ جموں کی اسپیشل ریلوے مجسٹریٹ عدالت نے بی سی سی آئی صدر متھن منہاس کے خلاف تاریخ پیدائش میں مبینہ جعل سازی سے متعلق شکایت پر پولیس کو ابتدائی تحقیقات کرنے کی ہدایت دی ہے۔ عدالت نے پولیس اسٹیشن نوآباد کے ایس ایچ او کو معاملے کی ابتدائی تحقیقات کرکے 3 ستمبر تک رپورٹ عدالت میں پیش کرنے کا حکم دیا ہے۔

یہ حکم جموں و کشمیر کرکٹ ایسوسی ایشن کے سابق جوائنٹ آننری سکریٹری سدرشن مہتا کی جانب سے دائر شکایت پر جاری کیا گیا۔ شکایت میں الزام عائد کیا گیا ہے کہ متھن منہاس نے قومی سطح پر جونیئر کرکٹ کھیلنے کے دوران عمر کے فائدے کے لیے اپنی تاریخ پیدائش سے متعلق مبینہ طور پر جعلی دستاویزات یا مختلف تاریخیں پیش کیں۔

شکایت کنندہ کے مطابق منہاس نے سب جونیئر اور جونیئر زمرے کے قومی ٹورنامنٹس میں انتخاب کے لیے مبینہ طور پر دو مختلف تاریخ پیدائش فراہم کیں۔ شکایت میں یہ بھی دعویٰ کیا گیا ہے کہ ان کی تاریخ پیدائش اسکول ریکارڈ اور دیگر کرکٹ ریکارڈ میں مختلف درج ہے۔

عدالت نے اپنے حکم میں کہا کہ کسی قابلِ دست اندازی جرم کے اندراج سے قبل بی این ایس ایس کی متعلقہ دفعات کے تحت ابتدائی تحقیقات کی جانی ضروری ہے۔ شکایت کے مطابق مہاراجہ ہری سنگھ ایگریکلچر کولیجیئٹ اسکول، نگبنی جموں کے ریکارڈ میں منہاس کی تاریخ پیدائش 9 دسمبر 1977 درج ہے، جبکہ دہلی اینڈ ڈسٹرکٹ کرکٹ ایسوسی ایشن کی سرکاری ویب سائٹ پر ان کی تاریخ پیدائش 12 اکتوبر 1979 درج ہونے کا دعویٰ کیا گیا ہے۔متھن منہاس جموں و کشمیر سے بی سی سی آئی کے پہلے صدر ہیں۔ انہیں گزشتہ سال ستمبر میں بی سی سی آئی صدر منتخب کیا گیا تھا۔

ہندوستھان سماچار

---------------

ہندوستان سماچار / محمد اصغر