کولمبیا (ساؤتھ کیرولائنا)، امریکہ، 18 اگست (ہ س)۔ امریکی اداکارہ ہیڈن پنیٹیئر کا اتوار کو 36 سال کی عمر میں یہاں گرین وِل میں انتقال ہوگیا۔ انہوں نے گھر پر آخری سانس لی۔ گرین وِل کاؤنٹی کے ’کورونر آفس‘ نے یہ اطلاع دی۔ کورونر آفس ہی موت کی وجوہات کی تحقیقات کرتا ہے۔ خیال کیا جا رہا ہے کہ ان کی موت کارڈیک اریسٹ سے ہوئی۔ کارڈیک اریسٹ میں دل اچانک دھڑکنا بند کردیتا ہے اور جسم کے اعضا اور دماغ میں خون کی گردش رک جاتی ہے۔ ایسا دل کے برقی نظام میں خرابی کے باعث ہوتا ہے۔ یہ صورتحال ہارٹ اٹیک سے مختلف ہوتی ہے۔
سی این این کی رپورٹ کے مطابق، پنیٹیئر نے 2000 کی دہائی کے آغاز میں اداکاری کے میدان میں نمایاں شناخت حاصل کی۔ بعد میں نشے کی لت اور ذہنی صحت سے متعلق مشکلات کے باعث وہ لائم لائٹ سے دور ہوگئیں۔ حال ہی میں ان کی ایک کتاب بھی شائع ہوئی ہے۔ اس میں انہوں نے اپنی مشکلات اور اپنے بھائی کو کھونے کے درد کے بارے میں کھل کر بات کی ہے۔ گرین وِل کاؤنٹی کورونر آفس نے پیر کو ایک بیان میں کہا کہ اتوار کی دوپہر گرین وِل میں اداکارہ کے بے ہوش پڑے ہونے کی اطلاع 911 پر دی گئی۔
کورونر آفس کے مطابق، ڈاکٹروں نے پنیٹیئر کو ہوش میں لانے کی کوشش کی۔ ایڈوانسڈ کارڈیک لائف سپورٹ سمیت دیگر اقدامات کیے گئے۔ تقریباً آدھے گھنٹے بعد پنیٹیئر کو مردہ قرار دے دیا گیا۔ پیر کو کیے گئے پوسٹ مارٹم میں چوٹ کا ایسا کوئی نشان نہیں ملا، جس سے ان کی موت ہوئی ہو۔ موت کی سرکاری وجہ کا تعین اضافی تحقیقات کے نتائج پر منحصر ہوگا۔
اسکِپ پنیٹیئر (اداکارہ کے والد) نے کہا، “دکھ کے ساتھ ہم اپنی پیاری ہیڈن کے انتقال کی اطلاع شیئر کر رہے ہیں۔ وہ ایک شاندار انسان اور توانائی سے بھرپور خاتون تھیں۔ انہوں نے اپنے مداحوں کی زندگیوں میں بے پناہ محبت اور خوشیاں بھریں۔” ایکٹر یونین اے اے جی-اے ایف ٹی آر اے نے بھی ہیڈن پنیٹیئر کے انتقال پر تعزیت کا اظہار کیا ہے۔ یونین نے کہا کہ وہ 1994 سے اس کی رکن تھیں۔ بطور چائلڈ آرٹسٹ ہیڈن کا ٹی وی اور فلموں میں طویل کیریئر رہا۔ ’ہیروز‘، ’نیش وِل‘ وغیرہ میں ان کے کردار یادگار رہے۔ ہماری ہمدردیاں ان کی بیٹی، خاندان، دوستوں اور مداحوں کے ساتھ ہیں۔
پنیٹیئر کی پیدائش 21 اگست 1989 کو پیلیسیڈز (نیویارک) میں ہوئی تھی۔ ان کے کیریئر کا آغاز اس وقت ہوا جب وہ صرف 11 ماہ کی تھیں اور اشتہارات میں نظر آنے لگی تھیں۔ انہوں نے 1998 میں فلم ’اے بگس لائف‘ اور ’اے بگس لائف: ریڈ-الانگ‘ سے اپنے فلمی کیریئر کا آغاز کیا۔ ’اے بگس لائف: ریڈ-الانگ‘ کے لیے وہ گریمی ایوارڈ کے لیے نامزد ہونے والی کم عمر ترین افراد میں سے ایک بنیں۔ انہوں نے 1996 سے 2000 تک سی بی ایس کے سوپ اوپرا ’گائیڈنگ لائٹ‘ میں لیزی اسپولڈنگ کا کردار ادا کیا۔
مداح پنیٹیئر کو 2005 کی فلم ’آئس پرنسس‘ میں مشیل ٹریکٹن برگ کے ساتھ ان کے کردار کے لیے بھی یاد کرتے ہیں۔ مشیل کا فروری 2025 میں ذیابیطس میلیٹس کے باعث پیدا ہونے والی پیچیدگیوں کی وجہ سے انتقال ہوچکا ہے۔
پنیٹیئر کو نوعمری میں ہی بڑی شناخت حاصل ہوگئی تھی۔ انہوں نے این بی سی ٹیلی ویژن سیریز ’ہیروز‘ میں خود بخود صحت یاب ہونے کی صلاحیت رکھنے والی چیئر لیڈر کلیئر بینٹ کا کردار ادا کیا۔ یہ شو 2006 سے 2010 تک چلا۔ 2011 میں پنیٹیئر ’اسکریم 4‘ میں کربی ریڈ کے کردار میں نظر آئیں اور کئی سال بعد اس ہارر فرنچائز کی چھٹی فلم میں بھی واپس آئیں۔ انہوں نے ’ری ممبر دی ٹائٹنز‘، مسابقتی چیئر لیڈنگ کی اینتھالوجی سیریز کی اگلی فلم ’برِنگ اٹ آن: آل اور نتھنگ‘ اور ’آئی لو یو، بیت کوپر‘ جیسی فلموں میں بھی اہم کردار ادا کیے۔
پنیٹیئر کو اے بی سی کی میوزیکل ڈرامہ سیریز ’نیش وِل‘ میں ایک اور اہم کردار ملا۔ اس میں انہوں نے 2012 سے 2018 تک کونی برٹن کے ساتھ نوجوان کنٹری میوزک اسٹار جولیئٹ بارنز کا کردار ادا کیا۔ برٹن نے انسٹاگرام پر پنیٹیئر کی کئی تصاویر پوسٹ کیں اور کہا کہ اس افسوسناک خبر کے لیے میرے پاس الفاظ نہیں ہیں۔ بس دل ٹوٹ گیا ہے۔ میں تم سے محبت کرتی ہوں۔ اب سکون سے سو جاؤ۔
پنیٹیئر کی اپنے سابق شوہر ولادیمیر کلِٹسکو سے ایک بیٹی ہے۔ 11 سالہ اس بچی کا نام کایا ہے۔ کلِٹسکو یوکرین کے سابق ورلڈ ہیوی ویٹ باکسنگ چیمپئن ہیں۔ کایا اپنے والد کے ساتھ رہتی ہے۔ روس کے حملے کے بعد پنیٹیئر نے عوامی طور پر یوکرین کی حمایت کی اور 2022 میں یوکرین کے عوام کے لیے طبی سامان اور حفاظتی اشیا کی خریداری کے لیے رقم جمع کرنے کے مقصد سے ایک ریلیف فنڈ شروع کیا۔ کلِٹسکو کے بھائی وِٹالی کلِٹسکو کیف کے میئر ہیں۔ پنیٹیئر نے 2024 میں ’ایمبر الرٹ‘ اور 2026 میں ’سلیپ واکر‘ فلم کے ذریعے اداکاری کے میدان میں واپسی کی تھی۔
ہندوستھان سماچار
---------------
ہندوستان سماچار / عبدالواحد
