گورکھپور، 18 اگست (ہ س)۔ وزیر اعلیٰ یوگی آدتیہ ناتھ نے زمین سے متعلق معاملات میں سستییا لاپرواہی کا مظاہرہ کرنے والے افسران کو سخت پیغام دیاہے۔جنتا درشن کے دوران جب ایک خاتون نے اپنی پریشانی سنائی کہ دبنگ یہ دھمکی دیتے ہوئے راستہ نہیں دے رہے ہیں کہ چاہے جہاں شکایت کرلو ، راستہ نہیں دیں گے۔ اس پر وزیر اعلیٰ نے سخت لہجے میں سینئر انتظامی عہدیداروں کو ہدایت دی کہ وہ اس بات کو یقینی بنائیں کہ خاتون کو راستہ ملے۔ اگر لیکھ پال، قانون گو اور تحصیلدار راستہ فراہم کرانے میں خود کو لاچار سمجھتے ہیں تو ان سب کو معطل کر دیا جائے۔

وزیر اعلیٰ نے اعلیٰ حکام کو یہ بھی ہدایت دی کہ جہاں بھی اراضی سے متعلق معاملات کو حل کرنے میں کوئی تاخیر ہو، متعلقہ اہلکاروں یا افسر کے خلاف سخت کارروائی کی جائے۔ کیس کی سنگینی کو دیکھتے ہوئے متعلقہ فرد کے خلاف معطلی کی کارروائی کی جائے۔ وزیراعلیٰ نے کہا کہ کسی بھی سطح پر سستی یا لاپرواہی قطعی طور پر ناقابل قبول ہے۔

وزیر اعلی یوگی آدتیہ ناتھ نے منگل کی صبح گورکھ ناتھ مندر میں منعقدہ جنتا درشن کے دوران لوگوں سے ملاقات کی اور ان کے مسائل سنے۔ مہنت دگ وجے ناتھ اسمرتی بھون کے باہر منعقدہ جنتا درشن کے دوران یوگی نے تقریباً 200 لوگوں سے ملاقات کی۔ وہ ان کے پاس گئے اور ان کے مسائل سنے۔ انہوں نے ان کی درخواستیں اپنے ہاتھ میں لیں، ان کا جائزہ لیا اور ان کے مسائل اور شکایات کا نوٹس لیا۔

وزیر اعلیٰ نے لوگوں سے کہا کہ وہ پریشان نہ ہوں، حکومت ہر ضرورت مند کے ساتھ کھڑی ہے۔ ہر مظلوم کا مسئلہ عزم کے ساتھ حل کیا جائے گا۔ ایک خاتون کی شکایت کا جواب دیتے ہوئے وزیر اعلیٰ نے کہا،”راستہ فراہم کرنے میں ناکامی پر لیکھ پال، قانونگو اور تحصیلدار کو معطل کر دیں۔“ جنتا درشن کے دوران، کئی دوسرے لوگوں نے بھی زمین سے متعلق معاملات میں ریونیو حکام کی طرف سے لاپرواہی برتنے کی شکایت کی، جس سے وزیر اعلیٰ نے متعلقہ ضلع مجسٹریٹس کو سخت کارروائی کرنے کی ہدایت دی۔

وزیر اعلیٰ یوگی آدتیہ ناتھ نے جنتا درشن میں علاج کے لیے مالی مدد مانگنے والے لوگوں سے کہا کہ حکومت پوری مدد فراہم کرے گی۔ اس مقصد کے لیے، ضرورت مندوں کو آیوشمان کارڈ جاری کیے جائیں گے اور اس سے آگے کی ضرورت پڑنے پر صوابدیدی فنڈز سے مدد فراہم کی جائے گی۔ جنتا درشن کے دوران وزیر اعلیٰ نے آس پاس موجود عہدیداروں کو ہدایت دی کہ وہ اس بات کو یقینی بنائیں کہ ہر ضرورت مند اور اہل شخص کو آیوشمان کارڈ ملے تاکہ انہیں علاج کرانے میں مشکلات کا سامنا نہ کرنا پڑے۔

ہندوستھان سماچار

ہندوستان سماچار / محمد شہزاد