نئی دہلی، 18 اگست(ہ س)۔ ہندوستان کی منفرد شناختی اتھارٹی (یو آئی ڈی اے آئی) نے اسکول کے بچوں کے لیے آدھار میں لازمی بائیو میٹرک اپ ڈیٹ (ایم بی یو) کے لیے ملک گیر مہم کے تحت دو کروڑ سے زیادہ اپ ڈیٹس مکمل کر لیے ہیں۔ اس خصوصی مہم کے تحت اب تک ملک بھر کے تقریبا 1.56 لاکھ اسکولوں کا احاطہ کیا جا چکا ہے۔
یو آئی ڈی اے آئی نے منگل کو بتایا کہ ستمبر 2025 میں شروع کی گئی اس مشن موڈ مہم کو یو ڈی آئی ایس ای + کے ساتھ تکنیکی انضمام سے مدد ملی ہے۔ اس کے ذریعے اسکولوں میں بچوں کے ایم بی یو کی صورتحال کے بارے میں معلومات دستیاب ہوتی ہیں۔ یو آئی ڈی اے آئی اور ریاستوں اور مرکز کے زیر انتظام علاقوں کے تعلیمی محکموں کے ساتھ مل کر اسکول کی سطح پر خصوصی کیمپوں کا انعقاد کیا گیا، تاکہ بچوں کے لیے آدھار بائیو میٹرک اپ ڈیٹ کی سہولت ان کے اسکولوں تک پہنچ سکے۔
یو آئی ڈی اے آئی کے مطابق، پانچ سال سے کم عمر کے بچوں کے آدھار اندراج کے دوران آبادی کی معلومات اور تصاویر لی جاتی ہیں، جبکہ فنگر پرنٹس اور آنکھوں کی پتلی کی بائیو میٹرک تفصیلات اس عمر میں ریکارڈ نہیں کی جاتی ہیں، کیونکہ یہ بائیو میٹرک خصوصیات اس عمر میں ترقی کر رہی ہوتی ہیں۔ ایم بی یو کے ذریعے وقت کے ساتھ بچے کے آدھار میں تازہ ترین بائیو میٹرک معلومات کو یقینی بنایا جاتا ہے۔
بچے کی پانچ سال کی عمر مکمل ہونے پر اور پھر 15 سال کی عمر میں بائیو میٹرک اپ ڈیٹ کرنا لازمی ہے۔ وقت پر ایم بی اے حاصل کرنا اسکول سے اعلی تعلیم میں منتقلی کے دوران آدھار کی تصدیق کے عمل کو ہموار کرتا ہے اور مختلف سرکاری خدمات اور اسکیموں سے فائدہ اٹھانے میں سہولت فراہم کرتا ہے جہاں آدھار کی تصدیق کی ضرورت پڑ سکتی ہے۔
یو آئی ڈی اے آئی نے بچوں کے ایم بی یو کی حوصلہ افزائی کرنے اور اسے مزید قابل رسائی بنانے کے لیے فیسوں میں بھی نرمی کی ہے۔ سات سے 15 سال کی عمر کے بچوں کے لیے ایم بی یو فیس یکم اکتوبر 2025 سے ایک سال کے لیے معاف کر دی گئی ہے، جبکہ ایم بی یو پہلے ہی پانچ سے سات اور 15 سے 17 سال کی عمر کے بچوں کے لیے مفت ہے۔ ایم بی یو اس طرح 30 ستمبر 2026 تک پانچ سے 17 سال کی عمر کے بچوں کے لیے مفت ہے۔
یو آئی ڈی اے آئی نے والدین اور سرپرستوں سے اپیل کی ہے کہ وہ اپنے بچوں کا وقت پر آدھار میں اندراج کرائیں۔ اتھارٹی کے مطابق، ایم بی اے نہ کرنے سے مختلف سرکاری اسکیموں کے تحت فوائد حاصل کرنے کے لیے آدھار کی تصدیق میں دشواری پیدا ہو سکتی ہے۔ اس کے علاوہ، مسابقتی اور یونیورسٹی کے داخلہ امتحانات جیسے این ای ای ٹی، جے ای ای اور سی یو ای ٹی کے لیے رجسٹریشن میں بھی پریشانی کا باعث بن سکتی ہے۔
ہندوستھان سماچار
---------------
ہندوستان سماچار / عبدالسلام صدیقی
