نئی دہلی، 18 اگست (ہ س)۔ بھارتیہ جنتا پارٹی(بی جے پی) کے سینئر رہنما اور رکن پارلیمنٹ روی شنکر پرساد نے یومِ آزادی کے موقع پر کانگریس ہیڈکوارٹر میں وندے ماترم کی مبینہ توہین اور اس کے بعد گوا میں پیدا ہونے والے تنازع پر کانگریس کو سخت تنقید کا نشانہ بنایا ہے۔ انہوں نے کہا کہ وندے ماترم نے ملک کی تحریکِ آزادی میں اہم کردار ادا کیا اور اس کی توہین آزادی کی جدوجہد کی تاریخ کی توہین کے مترادف ہے۔

منگل کو اپنی رہائش گاہ پر پریس کانفرنس سے خطاب کرتے ہوئے روی شنکر پرساد نے کہا کہ اگر کانگریس وندے ماترم کا احترام نہیں کر سکتی تو اسے تحریکِ آزادی کی وراثت پر اپنا اجارہ داری کا دعویٰ بھی ترک کر دینا چاہیے۔ انہوں نے الزام لگایا کہ وندے ماترم کے معاملے میں کانگریس کا موجودہ رویہ اس کی حقیقی سوچ کو ظاہر کرتا ہے۔

بی جے پی رکن پارلیمنٹ نے کانگریس کے ماضی کا حوالہ دیتے ہوئے کہا کہ 1950 میں ڈاکٹر راجندر پرساد نے وندے ماترم کو قومی گیت کے طور پر تسلیم کیے جانے کی حمایت کی تھی۔ انہوں نے سوال کیا کہ جس وراثت سے کانگریس کا تاریخی تعلق رہا ہے، آج وہی جماعت اس سے دوری کیوں اختیار کر رہی ہے؟

روی شنکر پرساد نے کانگریس پر ووٹ بینک کی سیاست کرنے کا الزام بھی عائد کیا۔ انہوں نے تین طلاق، شاہ بانو معاملہ، دفعہ 370 اور ’جن گن من‘ کے دوران مبینہ واک آؤٹ سمیت مختلف معاملات کا ذکر کرتے ہوئے کانگریس کی پالیسیوں پر سوال اٹھائے۔انہوں نے کہا کہ قومی مفاد سے متعلق معاملات پر کانگریس کا موقف مسلسل سوالات کی زد میں رہا ہے۔

بی جے پی رہنما نے آئینِ ہند کی اصل کاپی کا ذکر کرتے ہوئے کہا کہ اس میں بھگوان رام، شری کرشن، ہنومان جی اور گرو گوبند سنگھ سمیت مختلف ثقافتی اور تاریخی شخصیات کی تصاویر موجود ہیں۔ انہوں نے سوال کیا کہ اگر کانگریس ہندوستانی ثقافت اور ورثے پر اعتراض کرتی ہے تو آئین کی اصل روح اور اس میں موجود ثقافتی علامتوں کے بارے میں اس کا موقف کیا ہے؟

پرساد نے کانگریس صدر ملکارجن کھڑگے کو بھی تنقید کا نشانہ بناتے ہوئے کہا کہ کانگریس قیادت وندے ماترم کے معاملے پر ملک کو جواب دینے کے بجائے بی جے پی پر سیاسی الزامات عائد کر رہی ہے۔انہوں نے کانگریس سے مطالبہ کیا کہ وہ واضح کرے کہ وہ تحریکِ آزادی کی وراثت اور قومی گیت کے احترام کے حق میں ہے یا نہیں۔ انہوں نے کہا کہ ملک کے عوام کانگریس کے اس رویے کو دیکھ رہے ہیں اور آنے والے وقت میں عوام ہی اس کا جواب دیں گے۔

ہندوستھان سماچار

ہندوستان سماچار / Mohammad Khan