نئی دہلی، 18 اگست (ہ س)۔ وزیر دفاع راج ناتھ سنگھ نے منگل کے روز تینوں افواج کی خاتون افسران کی قیادت میں قومی کیڈٹ کور(این سی سی) کی 28 خاتون کیڈٹس کو بلند ترین اور دشوار گزار پہاڑی مہم ’اپراجیتا‘ کے لیے روانہ کیا۔ یہ مہم ہماچل پردیش کی اسپیتی وادی کو لداخ کے چانگ تھانگ علاقے سے جوڑنے والے 5,578 میٹر بلند پرانگ لا درے سے گزرے گی۔
اس مہم میں شامل کیڈٹس تقریباً 250 کلومیٹر کا فاصلہ 30 دن میں طے کریں گی۔ ان کی اوسط عمر 19 سال ہے، جبکہ سب سے کم عمر کیڈٹ کی عمر ساڑھے 16 سال ہے۔ مہم کے دوران یہ ٹیم گلیشیئرز، برفانی میدانوں، بلند پہاڑی صحراؤں اور دشوار گزار وادیوں سے گزرے گی۔
راج ناتھ سنگھ نے خاتون کیڈٹس کی شرکت کو خواتین کے حوصلے، عزم اور صلاحیتوں کی مضبوط مثال قرار دیتے ہوئے انہیں کامیاب اور محفوظ مہم کے لیے نیک خواہشات پیش کیں۔ انہوں نے کہا کہ ایسی مہمات نوجوانوں میں قیادت، ذہنی مضبوطی، نظم و ضبط اور خود اعتمادی پیدا کرنے میں اہم کردار ادا کرتی ہیں۔
وزیر دفاع نے کیڈٹس سے مہم کے دوران حفاظت، ماحولیات کے تحفظ اور مقامی آبادی کے ساتھ بہتر رابطے کو ترجیح دینے کی اپیل کی۔ انہوں نے کہا کہ یہ مہم کیڈٹس کی زندگی کا ایک یادگار مرحلہ ثابت ہوگی اور انہیں زندگی کے ہر میدان میں ’اپراجیتا‘ بنے رہنے کی ترغیب دے گی۔اس موقع پر این سی سی کے ڈائریکٹر جنرل لیفٹیننٹ جنرل وریندر وتس سمیت این سی سی اور وزارت دفاع کے دیگر اعلیٰ افسران بھی موجود تھے۔
ہندوستھان سماچار
ہندوستان سماچار / Mohammad Khan
