ممبئی ، 18 اگست (ہ س)۔ مہاراشٹر حکومت نے مہاراشٹر حکومت کارِ عمل کے قواعد 2026 کو نوٹیفائی کرتے ہوئے وزیراعلیٰ دیویندر فڑنویس کو وسیع تر عوامی مفاد میں کسی بھی کابینہ وزیر کے فیصلے کو تبدیل، ترمیم یا منسوخ کرنے کا اختیار دے دیا ہے۔ تاہم ایسے فیصلے کی وجوہات تحریری طور پر درج کرنا ضروری ہوگا اور یہ اختیار نیم عدالتی معاملات پر لاگو نہیں ہوگا۔
وزیراعلیٰ دفتر کے مطابق مہاراشٹر حکومت کارِ عمل کے قواعد 2026 کو 18 اگست 2026 کو نوٹیفائی کیا گیا۔ نئے قواعد کے تحت وزیراعلیٰ کسی بھی سرکاری محکمے سے فائل، دستاویز یا ریکارڈ طلب کرسکتے ہیں۔ وزیراعلیٰ کی ہدایت پر متعلقہ وزیر اور محکمہ کے سکریٹری کے لیے یہ دستاویزات فراہم کرنا لازمی ہوگا۔ تاہم روزمرہ کے انتظامی امور میں متعلقہ محکمے اپنے وزراء کے تئیں جواب دہ رہیں گے۔
نئے قواعد میں وزیراعلیٰ اور چیف سکریٹری کے تحت حکومت کی مجموعی نگرانی اور انتظامی کنٹرول کو مزید واضح کیا گیا ہے۔ کسی بھی سرکاری محکمے کو اخراجات کرنے سے قبل محکمہ مالیات سے منظوری حاصل کرنا ضروری ہوگا۔ اسی طرح حکومت کی جانب سے عوامی مفاد میں کسی بھی اعلان سے قبل اس پر ہونے والے اخراجات کی محکمہ مالیات سے پیشگی منظوری لینا لازمی ہوگا۔ مالی منظوری حاصل ہونے کے بعد ہی متعلقہ اعلان جاری کیا جاسکے گا۔
نئے قواعد کے تحت وزیراعلیٰ کو وزراء کے فیصلوں کا جائزہ لینے اور وسیع تر عوامی مفاد میں ان میں تبدیلی یا منسوخی کا اختیار حاصل ہوگا، جبکہ متعلقہ محکموں کے روزمرہ انتظامی امور میں وزراء کی جواب دہی برقرار رہے گی۔ اس طرح قواعد میں حکومت کے مجموعی انتظامی کنٹرول اور مالی نظم و ضبط کا طریقہ کار واضح کردیا گیا ہے۔
ہندوستھان سماچار
--------------------
ہندوستان سماچار / جاوید این اے
