جے پور، 18 اگست (ہ س)۔ راجستھان کے وزیراعلیٰ بھجن لال شرما نے کہا ہے کہ گاؤں اور ڈھانیوں سے لے کر شہروں تک جامع ترقی اور عوام کو معیاری بنیادی سہولیات فراہم کرنا ریاستی حکومت کی اولین ترجیح ہے۔ انہوں نے ضلع کلکٹروں کو صفائی، پینے کے پانی، سڑک، روشنی اور کچرا اٹھانے سمیت عوامی سہولیات کی باقاعدگی سے نگرانی کرنے اور شکایات کا ترجیحی بنیاد پر ازالہ کرنے کی ہدایت دی۔
وزیراعلیٰ نے منگل کو وزیراعلیٰ دفتر میں ’راج اُنتی‘ کی آٹھویں میٹنگ میں تقریباً 60 ہزار کروڑ روپے کی مختلف ترقیاتی اسکیموں اور منصوبوں کا جائزہ لیا۔ انہوں نے کہا کہ مانسون کے دوران پانی جمع ہونے، سڑکیں ٹوٹنے، بجلی کی فراہمی متاثر ہونے اور حادثات جیسے مسائل سامنے آتے ہیں، جنہیں ضلعی انتظامیہ حساسیت اور فوری کارروائی کے ساتھ حل کرے۔انہوں نے بتایا کہ سڑکوں کی مرمت اور دیگر ضروری کاموں کے لیے ہر میونسپل کارپوریشن کو 10 کروڑ، میونسپل کونسل کو 3 کروڑ اور میونسپلٹی کو ایک کروڑ روپے فراہم کیے گئے ہیں۔ کلکٹروں کو ہدایت دی گئی کہ ضروری مرمت کے کام فوری مکمل کرائے جائیں اور کام کے معیار کی باقاعدگی سے جانچ کی جائے۔ اہم سڑکوں، چوراہوں اور عوامی مقامات پر مناسب روشنی اور خراب اسٹریٹ لائٹس کی فوری مرمت بھی یقینی بنانے کو کہا گیا۔
وزیراعلیٰ نے پی ایم سوریہ گھر مفت بجلی اسکیم کا جائزہ لیتے ہوئے کہا کہ ریاست میں تقریباً تین لاکھ سولر پلانٹ لگائے جا چکے ہیں۔ باقی پلانٹ مارچ 2027 تک نصب کیے جائیں۔ انہوں نے بینک قرض کی سہولت آسان بنانے اور رینگس-سیکر ریلوے لائن کو ڈبل کرنے کے لیے زمین کے حصول کا عمل تیز کرنے کی ہدایت دی۔ امرت بھارت اسٹیشن اسکیم کے تحت ریاست کے 60 اسٹیشنوں پر جاری کاموں کا بھی جائزہ لیا گیا۔بھجن لال شرما نے جے پور میں مجوزہ ای ایس آئی میڈیکل کالج کے لیے مناسب زمین جلد منتخب کرکے تعمیراتی کام شروع کرنے کی ہدایت دی۔ انہوں نے کہا کہ ایچ پی سی ایل راجستھان ریفائنری ریاست کی ترقی میں سنگِ میل ثابت ہوگی۔ پچپدرا بائی پاس سے پٹاؤ انٹرچینج تک موجودہ ہائی وے کو چار لین کرنے کے لیے ضروری کارروائی بھی جلد مکمل کرنے کو کہا گیا۔
وزیراعلیٰ نے کہا کہ شہری اداروں میں گھروں اور تجارتی مراکز سے ٹھوس کچرا جمع کرنے کے لیے جی سی سی ماڈل کے تحت 4 ہزار ہاپر لگائے جائیں گے۔ انہوں نے ٹینڈر کا عمل جلد مکمل کرنے کی ہدایت دی۔ اس کے علاوہ ایگری اسٹیک کے تحت 100 فیصد فارمر رجسٹریشن، باقی گاؤں کی جیو ریفرنسنگ اور آیوشمان آروگیہ صحت بنیادی ڈھانچے کے باقی کام مشن موڈ میں مکمل کرنے کی ہدایت دی۔
وزیراعلیٰ نے راجستھان رابطہ پورٹل پر موصول شکایات کے فوری اور معیاری ازالے کی ہدایت دی۔ کروولی میونسپل کونسل میں مکیش کمار گپتا کی رہائشی پٹے کی فائل گم ہونے کے معاملے میں گہری تحقیقات کرکے ذمہ دار اہلکاروں کے خلاف سخت کارروائی کا حکم دیا۔ شکایت کے بعد متعلقہ اسسٹنٹ ایڈمنسٹریٹو افسر کو معطل کیا گیا اور اب درخواست گزار کو رہائشی پٹہ بھی جاری کر دیا گیا ہے۔میٹنگ میں چیف سکریٹری وی۔ سری نواس، متعلقہ محکموں کے اعلیٰ افسران، ڈویژنل کمشنرز اور ضلع کلکٹرز ویڈیو کانفرنسنگ کے ذریعے شریک ہوئے۔
ہندوستھان سماچار
ہندوستان سماچار / Mohammad Khan
