نئی دہلی، 18 اگست (ہ س)۔ راؤز ایونیو کورٹ نے دہلی کے دوا گھوٹالہ معاملے میں دہلی کے محکمہ صحت کی سابق ڈائریکٹر جنرل ڈاکٹر وتسلا اگروال کو چار ہفتوں کی عبوری ضمانت دے دی ہے۔ اسپیشل جج ودیا پرکاش نے ایک لاکھ روپے کے ذاتی مچلکے اور اتنی ہی رقم کے دو ضامنوں کی شرط پر انہیں رہا کرنے کا حکم دیا۔

اس سے قبل عدالت نے 17 اگست کو اس معاملے کے ملزم ڈاکٹر ونود کمار رنگا کی ضمانت کی درخواست مسترد کر دی تھی۔ دونوں ملزمان کو اینٹی کرپشن برانچ نے گرفتار کیا تھا۔ دونوں پر ادویات اور طبی آلات کی خریداری میں 700 کروڑ روپے کی بے ضابطگی کا الزام ہے۔ سماعت کے دوران ڈاکٹر وتسلا اگروال کی جانب سے پیش ہوئے سینئر وکیل رمیش گپتا نے کہا تھا کہ وہ گزشتہ 40 دنوں سے جیل میں ہیں۔ درخواست گزار کو صحت سے متعلق مسائل بھی ہیں، جن کا ذکر حراست کے حکم میں بھی کیا گیا ہے۔ رمیش گپتا نے کہا تھا کہ وتسلا اگروال کو کچھ اعلیٰ عہدے داروں کو بچانے کے لیے قربانی کا بکرا بنایا گیا ہے۔ انہوں نے کہا تھا کہ وتسلا اگروال کے گھر سے کوئی چیز برآمد نہیں ہوئی ہے۔

ملزم ڈاکٹر ونود کمار رنگا کی جانب سے پیش ہوئے وکیل وجے بشنوئی نے کہا تھا کہ درخواست گزار 54 دنوں سے حراست میں ہیں۔ انہوں نے کہا تھا کہ اگر تفتیشی ایجنسی کو تحقیقات کے لیے مزید وقت درکار ہے تو درخواست گزار کو عبوری ضمانت دی جانی چاہیے۔ تاہم عدالت نے کہا تھا کہ وہ درخواست گزار کو عبوری ضمانت پر رہا نہیں کرنا چاہتی۔اس معاملے میں اینٹی کرپشن برانچ نے محکمہ نگرانی کی شکایت پر 2 جون کو ایف آئی آر درج کی تھی۔ ایف آئی آر میں ادویات، جراحی کے سامان اور طبی آلات کی خریداری میں تقریباً 700 کروڑ روپے کی مبینہ خرد برد کا الزام عائد کیا گیا ہے۔ ایف آئی آر کے مطابق دہلی کے محکمہ صحت کے ڈائریکٹوریٹ جنرل اور دہلی حکومت کی مرکزی خریداری ایجنسی نے اس مبینہ بے ضابطگی کو انجام دیا۔ہندوستھان سماچار

ہندوستان سماچار / Mohammad Khan