18 سے 31 اگست تک تھائی لینڈ کے سورت تھانی واقع وبھاوادی رنگسِٹ کیمپ میں جاری رہے گی مشق

نئی دہلی، 17 اگست (ہ س)۔

بھارت-تھائی لینڈ مشترکہ فوجی مشق ’میتری‘ کے 15ویں ایڈیشن میں شرکت کے لیے بھارتی فوج کا دستہ پیر کو تھائی لینڈ روانہ ہو گیا۔ یہ مشق اقوام متحدہ کے چارٹر کے باب سات کے تحت جنگلاتی اور شہری ماحول میں شورش اور دہشت گردی سے نمٹنے کے لیے مشترکہ کارروائیاں انجام دینے کی دونوں ممالک کی صلاحیتوں میں اضافہ کرے گی۔

وزارت دفاع کے مطابق یہ مشق 18 سے 31 اگست تک تھائی لینڈ کے سورت تھانی میں واقع وبھاوادی رنگسِٹ کیمپ میں منعقد ہوگی۔ اس مشق کا گزشتہ ایڈیشن ستمبر 2025 میں میگھالیہ کے امروئی میں منعقد ہوا تھا۔

بھارتی فوج اور رائل تھائی آرمی کے دستوں میں 85-85 فوجی شامل ہیں۔ بھارتی فوج کے دستے میں بنیادی طور پر 9 گورکھا رائفلز کے فوجی شامل ہیں، جبکہ تھائی فوج کے دستے میں پانچویں ڈویژن کی 25ویں انفنٹری بریگیڈ کی تیسری بٹالین کے جوان شامل ہیں۔

اس مشق میں کمپنی سطح کی مشترکہ تربیت شامل ہوگی، جس میں جنگلاتی اور نیم شہری علاقوں میں کارروائیوں پر توجہ مرکوز کی جائے گی۔

میتری مشق کا مقصد بھارت اور تھائی لینڈ کے درمیان فوجی تعاون کو فروغ دینا ہے۔ تربیت کے دوران فیلڈ مشقیں، جنگ سے متعلق تبادلہ خیال، لیکچرز، مظاہرے اور اختتامی تصدیقی مشق بھی منعقد کی جائے گی۔ دونوں دستے آپریشنل تجربات کا تبادلہ کریں گے اور مشترکہ کارروائیوں کے دوران استعمال ہونے والے جدید آلات اور ٹیکنالوجی کا مظاہرہ بھی کریں گے۔

ہندوستھان سماچار

ہندوستان سماچار / عطاءاللہ